Auleria Wakudumo

ONANGHULO – Okakilinika mOnanghulo moshitukulwa shaHangwena oko ka li ke na okupwa okutungwa nokupatuluka mo2018 natango inaka patuluka. 

Okakilinika oko ka teelelwa oule wefimbo kovakwashiwana mopaife ota ka tungilwa keehedi meni lokakilinika komivelo. 

Nonande ta ka monika ka tungekeka okudja koshivelo, okuya meni lokakilinika, eehedi oshoyo ekuma ola hovela nale okukulupa omanga inaka longifwa. 

Kundana eshi a ya mokakilinika okwa didilika kutya omuvelo wokuya mwokandjuwo kootate owa lika filufilu poshivelo keehedi. Kekuma lomonduda imwe namo omwa hovela nale okuninga nai kekuma taku fekelwa molwa omeva. 

Omunambelewawiliki George Jeremia okwa holola kutya okakilinika inaka patuluka molwaashi ehangano lokuandjaneka olusheno, Nored ina kwatakanifa natango ongodi yaye yolusheno kokakilinika. 

“Shama ashike Nored a kwatakanifa okakilinika, nafye oilonga oya ya momupini osho. Ondishishi kutya nafye katuna oikwa noipangifo aishe unene tuu omashina omokakilinika ashike otwe li longekida okuyandja ekwafo koshiwana naasho tuna po,” Jeremia ta ti. 

Jeremia okwa holola yo kutya okakilinika oka iwa moshipala kovatungi ovo va kala nokulundululwa shaashi itava wanifa po oilonga yavo. 

Okwa ti onhele yokakilinika aka oya yandjwa nale mu 01 Septemba 2016 nepangelo olali lina edilaadilo lokumana ngeno okakilinika aka muMalitsa 2018. 

Ashiek, omutungi ou a pewa oteendela tete LGB Enterprises okwa kufwa oilonga oyo shaashi ka li ta wanifa po oilonga yaye ngaashi va udafana. 

“Otwa ninga eindilo opo tu pewe omutungi umwe nosha kwata oule wefimbo. Otwa ka mona ashike ou ta twikile ko muJanuali odula ya dja ko,” Jeremia ta holola ngaho. 

Ou eli omukulunhu wouhaku mOhangwena pakafimbo, Festus Kuushomwa okwa holola kutya ovena oukilinika vavali moshitukulwa ovo va pwa okutungwa ashike inava patuluka molwa omaimbo ma shoneelela.  Kuushomwa okwa holola kutya opena natango okakilinika kamwe Onamafila PHC nako ka pwa okutungwa ashike inaka patuluka shaashi ka teelela eshina lukupomba onyata nokukwatakanifa oudjuwo aveshe mokakilinika. 

 “Ashishe eshi oshina okuningwa okupitila movanambelewa vepangelo keembonge dakula. Okakilinika kaNanghulo oka tungwa keemiliona N$10.4 omanga Onamafila ya tungwa kongushu yoshimaliwa shi fike peemiliona N$ 19,” Kuushomwa ta holola.  Okakilinika komOnanghulo okena onhele yokumona ounona, onduda yokuxunga omwenyo ounona, eenduda nhee dokuhakulila, onduda yokuninga omakonakono omikifi da yooloka, onduda yokupungulila omiti, onduda yovanambelewa vouhaku nadikwao dimwe da wedwa po. 

Omupopiliko waNored Simon Lukas okwe li kanyuna omapopyo kutya Nored oye taimbi okakilinika ka patuluke. 

Okwa ti nakutunga vati oye ina ninga eindilo kuNored lokupewa omita yolusheno oshoyo okutula mo eindilo lodja po oyo tai ulike kutya Nored ota dulu okuninga omapekapeko mokakilinika nokukwatakanifa olusheno. 

 “Ei ivali oya fimana neenghono nohai pumbiwa okuningwa kukeshe umwe opo Nored a kwatakanifew okakilinika kopaala yaye yolusheno,” Lukas tya yelifa. 

Lukas okwa ti Nored ota twikile okulongela pamwe nepangelo okukwashilipaleka kutya ova andjakaneka olusheno moNamibia. 

-wakudumoauleria@gmail.com