Victoria Immanuel
Omulongwa gwomondondo yimwe kosikola Naiti Combined moshitopolwa shaMusati oshiwike sha zi ko okwa thiki posikola nondjato a ningi ye mwene ndjoka ya shololitha omukuluntusikola.
Omukuluntusikola Vaino Shimutwikeni okwa hokolola kutya ongula manga aalongwa taya hiti moongulu okwa mono omulongwa e na ekiti lya ningwa mokashako ketete lyoInstant.
“Shika osha li sha piyaganeke omweyo gwandje, sho nda tala mo meni onda adha mo oshihakautu inaashi pya, ondunga noonyandi,” ta hokolola ngaaka.
Ta ti, oshoka okwa li e na mo okakiti okahwepo ihe hako naana, oke vule ngaa hoka a li a ningi ye mwene, okwe ka pe omulongwa ngoka manga ta kongo ekwatho lyondjato yi li hwepo.
Shimutukweni okwa ti okanona hoka oke na natango aamwayinagona yamwe ye li posikola, nomolwomatompelo gamwe ga faathana okwa li a ka talela po egumbo lyawo omumvo gwa yi, ihe onkalo kayi li nawa.
“Yinakulu yokanona hoka ke na iiyemo yasha, yina yokanona hoka anuwa oku li kuushimba ihe iha tala ko kokanona ke,” ta hokolola ngaaka.
Shimutwikeni okwa ti, osikola ye oyi na aalongwa oyendji ya taalela onkalo odhigu, yamwe kaye na omizalo dhosikola yamwe ohaya zi komagumbo nondjala.
Ta ti, ongomukuluntusikola okwa kambadhala okulandela mboka ya kala ya taalela onkalo ondhigu naashoka ta vulu, ihe onkalo oyu uka ashike komeho.
“Otandi indile moshigwana kukehe ngoka e na shoka ta vulu okukwatha nasho aalongwa ye, opo wo ya vule okwiitula mo meyilongo lyawo,” ta indile ngaaka.
Shimutukweni okwa indile ishewe aakuluntu ya itule mo mokuyambidhidha aanona yawo ya kale taya talelepo oosikola ya tale onkalo yaanona koosikola.