Victoria Immanuel

Omupresidente Netumbo Nandi-Ndaitwah okwa ti ngoka a li kakukutu komatanga gegameno Solomon ‘Jesus’ Hawala, ota pewa efumbiko lyopapangelo ongesimaneko lyuupendafule woshilongo shika.

Hawala, ngoka a li a valwa mesiku lyonena, omasiku 17 Aguste 1935 okwa hulitha momasiku 11 Aguste 2025 mepupipi lyomimvo 89, onota ka fumbikwa momasiku gahamano gaSepetemba nuumvo kOngwediva moshitopolwa shaShana.

Momushangwa gwapresidente Nandi-Ndaitwah okwa ti Hawala okwa li ependafule, omunankondo osho wo omukwiita moshili.

“Hawala okwa li omukwiita nokwa dhana onkandangala onene mekondjelomanguluko lyaNamibia. Okwa kala omukwatelikomeho goPLAN,” ta ti ngaaka.

Nandi-Ndaitwah okwa ti momumvo 2000, Hawala okwa li u ulikwa ongakakukutu komanda gwetanga lyegameno, sigo 2006. 

Mehuliloshiwike minista gwetanga lyegameno Frans Kapofi osho wo omugandji gomayele Christine ǁHoebes nangoloneya gwoshitopolwa shOshana Hofni Iipinge, oya gandja omahekeleko kaakwanezimo pegumbo lye kOhakweenyanga mOngwediva.

Omwana gwomumati Taapopi Hawala okwa dhimbulukwa he ongomulumentu gomatumbulo omafupi ihe ayihe ohe yi gwanitha po.

“Okwe tu putudhila omikalo, nonando ka li he tu dhenge komalutu, ngele twe mu tala koshipala she, out shi shi nale kutya ope na sha shimwe kaashi li mondjila,” ta popi ngaaka.

Ta ti he okwa li e hole uunafaalama nuunamapya, nethimbo olindji sho a li a yi moshipundi shevululuko okwa li ha kala unene kofaalama ye.

Taapopi okwa ti he okwa li omuyogoki, ka li e hole oongaga, naasho a li a ningwa mwene gwomukunda Ohakweenyanga okwa li ha longekidha omasiku gokoopaleka omukunda. 

Hawala okwa thigi ko omukulukadhi gwe Laimi Hawala osho wo aanona yahamano.

-vkaapanda@nepc.com.na