ONDANGWA – Kakukutu kopolifi Inspector General Joseph Shikongo okwa kumaida ovanyasha ovo ve li komadeulo opolifi opo ve litule mo nokupwilikina eshi tava lombwelwa kovanambelewa.
Edi okwe di popya moshipopiwa shaye sha leshwa ponhele yaye komukulunhu wopolifi moshitukulwa shaShana Commissioner Naftal Sakaria onghela pefimbo lepatululo pambelewa lomadeulo opolifi kOndangwa. Ovanyasha 1 061 ova tameka omadeulo avo kendiki loRuben Danger Ashipala oko haku ningilwa omadeulo opolifi monooli.
Ovalumenhu tava kufa ombinga komadeulo ove li 666 omanga ovakainhu ove li 395 okudja koitukulwa ya yooloka.
Okwa ti kendiki Pius Joseph Kaundu, li li koshitukulwa shaMaheke oshoyo endiki li li Simon Mutumba li koshitukulwa shaZambezi nako oku na omadeulo opolifi a tameke nale.
Okwa yelifa ta ti omwaalu 2 004 wovanyasha otava kufa ombinga komadeulo opolifi komandiki atatu a yooloka. Shikongo okwa yelifa ta ti ovanyasha ve li komadeulo aveshe ova ninga omaindilo oku ka longa mopolifi ngaashi naana omudo keshe opolifi hai pula ovanhu va ninge omaindilo.
Okwa fatulula ta ti elalakano lomadeulo okuyandja eetundi kovadeulwa opo va kale va pyokoka ngeenge tava ka ninga ovanambelewa vopolifi.
“Komadeulo ohaku longwa oilongwa ya yooloka noi li ya fimana komunhu tete manga ina ka ninga omupolifi. Omadeulo aa okwa kwatela mo ehongo nghene omupolifi e na okulihumbata nokufimaneka oilonga yaye,” ta ti.
Okwa ti elitulemo ola fimana osho yo okuliufa komilandu odo di li komadeulo molwaashi otashi kwafele omunhu a ka kale omupolifi omuduliki.
Shikongo okwa ti ovanyasha ove na okukala eemwedi omuwoi komadeulo mwa kwatelwa eemwedi mbali omo hava tumwa va ye koitaashi yopolifi ve ke lideule.
Okwa yelifa ta ti eifano lokukala omupolifi otali pula omunhu e na ohokwe ndele hamunhu a hala okuninga omupolifi shaashi a hala okupewa odjabi.
“Fimanekeni ovanambelewa tave mu pe omadeulo. Wanifei po oinyangadalwa yeni aishe tamu pewa pefimbo lomadeulo,” ta ti.
Okwa ti omupolifi omunhu a pumbwa okulihumbata nawa nota ulike oshihopaenewa shiwa moshiwana.
Okwa pandula epangelo laNamibia eshi tali twikile nokuyandja oilonga kovanyasha osho yo okukwashipaleke kutya moshilongo omu na ovapolifi tava tula po eameno.
-fhamalwa@nepc.com.na