Omulumenhu weedula 26 omukwashiwana waAngola okwa kwatwa po molwaashi vati a hombola okaana keedula 14 ke li mondodo onhinhano. 

Opolifi oya hokolola tai ti ina yokaana naye okwa kwatwa po. 

Oshiningwanima osha ningwa mexuliloshivike komukunda Ncaute koshitukulwa shaKavango West. Omupopiliko wopolifi koshitukulwa shaKavango West Chief Inspector Raimbert Muronga okwa koleka oshiningwanima eshi shomunafikola a hombolwa peedula dishona. 

Opolifi oya hokolola tai ti omufekelwa okwa pula ina weedula 41, wokakadona kutya okwa hala oku ka hombola. 

Otaku hokololwa kutya okudja opo vati ina yokaana okwa dimina omona a hombolwe po. 

Omufekelwa okwa udanekela ina yookana kutya ote ka futile ofikola osho yo oku ka yambidida meemhumbwe dako adishe. 

Aveshe otava holoka nena momhangu yamengestalata waRundu. 

Omufekelwa oku li omunailonga ha tonatele eengobe. 

-fhamalwa@nepc.com.na