Okanyofi ta ka tungwa koshipangelo shaNandjokwe oke li pokupwa molwaashi ovatungi otava longo nelitulemo navali kape na omashongo a didilikwa fiyo opapa.
Edi oda kolekwa komukulunhuwiliki wouhaku moshitukulwa shaShikoto Joshua Nghipangelwa.
Okwa ti okanyofi aka otaka kala kakula moshilongo shaashi otaka tungwa ke na eembete 120.
Otaka tungwa kongushu yeemiliona N$60. Nghipangelwa okwa ti okanyofi oka tamekwa okutungwa omudo 2016 ashike opa kala pe na omashongo a imba ka pwe pefimbo.
“Ehangano olo kwa li tali tungu tete okanyofi okwa li tali ende nakashona shaashi la taalela omukundu woilongifo inai wana mwa kwatelwa ovatungi,” ta ti.
Okwa yelifa ta ti ngeno osho okanyofi oka pwa nale okutungwa ashike ombedi otai pewa ehangano la tameka okutunga tete.
Nghipangelwa okwa ti paife ehangano August 26 olo la pewa oshinakuwanifa shokutunga okanyofi.
“Paife oilonga yokutunga okanyofi otai twikile nawa komesho. Ehangano eli oli na ovatungi tava longo nondjungu,” ta ti.
Omukulunhuwiliki okwa ti paife ngaha okanyofi oka ninga eedula omuwoi inaka pwa.
“Otwa faneka opo okanyofi ka kale ka pwa momwedi Kotoba. Omashina amwe okwa tulwa mo nale meenduda,” ta ti.
Okwa ti okanyofi otaka etele ovakainhu ouwa molwaashi itava kala vali va finana ngeenge tava ka pulumuna.
Okwa weda po ta ti oshipangelo okwa li nale sha taalela omashongo okanyofi kashona muhe na eembete da wana ngeenge ovakainhu tava i koshipangelo.
Natango, Nghipangelwa okwa ti ovanaudu koshipangelo shaMuthiya itava ka kala vali ofika momutenya ngeenge ve li momukweyo molwaashi paife koshipangelo otaku tungwa etala lomudile.
Etala otali tungwa koshimaliwa shoN$400 000.
Okwa ti otali tungwa kouministeli wouhaku nomayakulo opashiwana konima a lombwela minista kutya ovanaudu ova pumbwa etala. “Ovanhu tava tungu etala ove li popepi nokumana paife,” ta ti.
Okwa yelifa ta ti etala otali tungwa li na oipundi opo ovanaudu ngeenge ve li momukweyo va kale omutumba koipundi.
Ta ti yo okapangelo ke li koTsintsabis oka longululwa molwaashi oka li ka kulupa. fhamalwa@nepc.com.na