Sawi Hausiku
Rundu-Nkuru Ministera Elijah Ngurare katente asi kabinete kavapulisilire kutengwidirapo elikwamo lyokugwana nondja, ndi asi togwana yimaliwa poopo tupu ono kumana kurugana. Eyi kuna yiretesapo asi vavatere vantu vana kara asi tumbu tumbu. Ngurare katumbwire nonkango morwa nokutanta asi mavango gono green scheme gahepa kuzangura moomu yakere nare mokuwapukurura ekonomi lyetu ntani kukulika nomukunda doponze.
Nkuru ministera kakahuyungire momapeu posilika sompo kavadene worudi roVaShambyu VaMuturu Wasingangera Cultural Festival, esi kavawapayikire varero lyoRudi rwaShambyu pomukunda gwaKayengona, omu kahundilire vakansela nonombunga degendeso marudi varuganene kumwe mokutulisapo noprojeka, omu navatusilisapo yirugana vadinkantu vetu vagwana yirugana. Elikwamo eli kuna kulitulisa mosirugana uministeli wonodoropa nekuliko nomukunda doponze zodoropa, omu vana kugava yirugana posiruwo sosisupi kwavana vana pili yirugana, vana kara nomarutu gomawa vakurona ndi vanano, vadinakntu vana kara konomukunda doponze varuganene nondja ndi yimaliwa. Elikwamo lyangesi, kuna kuligwana moveta zina kutanta asi tazikagusapo ruhepo, kutunga matungo ntani kuretesapo nondja dina gwanene, kwakara mpmbapira zetu zekuliko nomukunda. Ngurare sinpe karugwilire asi epangero lina lituramo asi nkenye mukunda moNamibia vahepa kugwana mbatero zina kugava ekwafo pantateko, muna hamene rutjeno, mema ntani uturo, magwanekero,nonzira, nosure ntani yipangero. ‘’ Kapi tatuvhura kuhuyunga kukulika ekonomi nye owo vana kara konomukunda doponze kwato eyi vana kugwana nye awo vana kara nomagano omu navakambekako kuwoko. ‘’ yimo ngoso ana kuyididilika. Apa nye ana kudiworoka posiruwo oso gakere mombunga zovadinkantu waSWAPO, PM omu ana kuyitanta asi vantu twahepa kuruganesa mauruvi getu asi ngapi natu wapukurura ekonomi lyetu.
‘’ Mono mvhura edi 35, kwakere nomaganodona gokut anta as i konomukunda kwato vantu vakara noudivi. Nye nonkondo modili mwawo. Nsene asi vantu vatunga konomukunda vakara noudivi ntani nonkondo dokurugana kodili, kapi yina kara hepero asi tukapapare nako peke.’’ Yimo ana kutanta. Ngurare simpe kapandwire nompitisili dopampo, omu simpe vana kutwara komeho magano getu gopampo eyi twapinga kokakuru, eyi ngaturugana aso simpe sirongo sahana kumanguruka.
Age kahundlire vadinkantu asi vahepa kutwara komeho upingwa wetu, nomukumo, nokunkondopeka oyo,’’ nompitisili detu dopampo kapisi asi dokugava tupu mukumo, nye awo vamwe vakara asi womutaro. Omu nye vana kuretesapo yifanayika yompo, udano wompo ntani kusimwitira masanseko, omu vadinkantu vetu navagusamo yawo omu nayikara nye asi edidiliko kweyi twarugana yikarerepo.
-Nampa