ONGWEDIVA – Ovashingi veetaksi ova hokolola tava ti onghalo yondado yomahooli tai ka wedelwa moAngola otai shunifa Ngungula pedu molwaashi itava ka mona vali omhito yokulanda omahooli kombilixa. 

“Paife kOshikango itaku kala vali kuyadi omahooli aNgungula molwaashi otaa ka ninga ondilo. Ohatu ka mona oixuna ngeenge tashi ya pokunwefa omahooli moAngola,” umwe womovashingi veetaksi ta ti. 

Ngungula okwa etela Ovanamibia omauwa molwaashi ohava nwefa omahooli kolimbixa mokufaafanifa nondado yomahooli moNamibia. 

Omaumbo mahapu e li popepi nOshikango osho yo amwepo e li kondje yoshitukulwa shaHangwena okwa ningwa po oitaashi yomahooli taa landifwa. 

Okwa didilikwa omwedi ou koshilandopangelo Luanda moAngola ovanhu kwa li va ngudumana tava ningi ekangha lopambili konima epangelo la shivifa kutya omahooli otaa wedelwa. 

Pefimbo lekangha okwa lopotwa eefitola dimwe da xwikwa po osho nokuli sha eta ovadjaidjai vamwe va fiye po Angola molwaashi ova tila okuninga oihakanwa yokudengwa. 

Kundana onghela okwa ninga eenghundafana novanhu ovo hava ka nwefa omahooli moAngola nova hokolola tava ti itava ka nwefa vali omahooli moAngola shaashi ondado otai ka wedelwa. 

“Eshi omahooli taa wedelwa moAngola nena nafye ngeenge hatu ka nwefa ohatu a lande kondilo. Oshikumungu eshi nafye oshe tu kuma,” umwe ta ti. 

Okwa yelifa ta ti oshixwepo okutameka ta nwefa omahooli moNamibia shaashi omahooli otaa tameke okukala e na ondilo koAngola. 

Daniel Shindume a shivika nawa Super Cool ou e li mwene woshitaashi shomahooli pOnhuno okwa ti natango ihava mono ovanhu vahapu tava ka nwefa omahooli shaashi ovanhu ove hole okuya kuNgungula oku ku na ombilixa. 

“Onghalo yaNgungula oya denga oitaashi yomahooli mOhangwena shaashi keshe umwe okwa uka kuNgungula,” ta ti. 

Omupopiliko wopolifi koshitukulwa shaHangwena Warrant Andreas Nghiyolwa okwa ti nonande koAngola ku na ekangha Ngungula onghe ngaa ta twikile okulandifwa kOshikango. 

“Natango ngeenge owa i kOshikango oto hange ko ashike Ovaangola vahapu tava landifa omahooli shaashi ohava mono ovalandi vahapu,” ta ti. 

Okwa ti onghalo yovanhu tava ponokelwa nokunyekwa omaliko avo keengaba onghee ngaa tai twikile. 

Hangula Katamba ha shingi otaksi okwa ti keengamba paife okwa nyika oshiponga shaashi okuhadi ookalyamupombo. 

“Ame paife ohandi nwefa omahooli popepi nOshikango shaashi ngeenge owa i keengaba moixwa oto dengwa nokunyekwa omaliko oye,” ta ti. 

Okwa ti Ovaangola paife ova tumba oshinyenu shaashi omahooli otaa wedelwa moshilongo shavo. 

-fhamalwa@nepc.com.na