Ovalumenhu vavali ova kwatwa po eshi va hangika tava yuvu oshikombo osho sha vakwa mofaalama komukunda Namatanga moshitukulwa shaKunene. 

Oshiningwanima eshi osha ningwa Etivali efimbo lokomatango. 

Omupopiliko wopolifi moshitukulwa shaKunene Warrant Kristofin Hamunyela okwa hokolola ta ti oumbudi woimuna owa londa unene koshitukulwa shavo, unene tuu keefaalama. 

Okwa ti efimbo keshe koitaashi yopolifi ohaku kala ovanhu va ngudumana tava nyenyeta eshi oimuna yavo ya vakwa po. 

Hamunyela okwati ookalyamupombo ohava ponokele eefaalama dovanhu ndele tava dipaa eengobe dokulondeka ombelela. 

“Oshivike sha dja ko okwa lopotwa ongobe ya hangika mofaalama ya dipawa komunhu ndele ta faduka po,” ta ti. 

Okwa ti osha nyika oshiponga ngeenge omunhu ta i mofaalama yonhumba ina pewa epitikilo kumwene wayo shaashi ota dulu okumonifwa oshiponga. 

Hamunyela okwa ti ovanhu vamwe ohava hangika tava landifa eedingu ashike ohava dopa okuyandja ouyelele kutya eedingu oda dja peni. 

Okwa ti osha fimana opo ovanafaalama va kale tava valula oimuna molwaashi ovanailonga vopaife navo ohave li ngi ookalyamupombo. 

“Oshiwana nashi longele kumwe nopolifi okukondjifa oumbudi woimuna momidingonoko davo,” ta ti. 

-fhamalwa@nepc.com.na