Auleria Wakudumo 

Oshakati – Omhangu yopombada yaShakati oya yandja ehandukilo leedula mbali modolongo komulumenhu weedula 32 eshi vati a vaka oshingulu shi na ongushu yoshimaliwa shi fike poN$450. 

Jona Nghilifilwa Ndakalako okwa li a dimina momhangu yamagestrata mOshakati omo a holoka tete kutya oye a vaka oshingulu shomunangeshefa Vivi Kamati. Momhanguyamangestrata mOshakati, Ndakalako okwa li a pewa ehandukilo leedula mbali modolongo ashike eedula edi mbali odali da kupulwashi nokwa li ashike a pewa ehandukilo lokulihumbata nawa oule weedula nhano ina udikila a nyona omunyonena wa faafana ile a udikile sha sha faafana. 

Eshi osha hala okutya Ndakalako ita kala vali modolongo oule weedula odo a pewa ehandukilo ngeenge okwa kala ina udikila sha moule weedula nhano. 

Nonande Ndakalako a li a pewa ehandukilo lokuhakala vali modolongo, omueti woihokolola wepangelo okwa shuna mo oshibofa shaNdakalako shaashi vati ina pewa ehandukilo li fike pwaasho a nyona. 

Okwa ti etokolo la ningwa komhangu yamangestrata olihalula, lo itali tu kumwe komulandu osho yo oveta yokuvaka oimuna oyo tai holola kutya omunhu na kale modolongo oule weedula mbali. 

Omupanguli momhangu yopombada yaShakati David Munsu pamwe nomupanguli Justice Salionga ova twa kumwe nomueti woihokolola wepangelo opo Ndakalako a pewululwe ehandukilo leedula mbali modolongo shaashi vati ota li tu kumwe noveta yoimuna. 

Ovapanguli ava ova holola momukanda kutya mangestrata ina shikula omulandu wevako loimuna eshi ina yadja ehandukilo lasha kuNdakalako. Munsu okwa ti omhangu okwa li i na ashike okuyandja ehandukilo li li koshi yeedula mbali ngaashi shi li moveta nomomulandu wokuvaka oimuna ile a kufe ko ashike ehandukilo lefimbo limwe ndele hakukufa po ehandukilo alishe. 

Onghene, omhanguyopombada oya tokola okupa Ndakalako eedula mbali mokalimosho, omo eemwedi hamano da ekelwashi ngeenge ina udikila sha sha faafana moule weedula nhano. 

Eshi osha hala okutya Ndakalako ota kala modolongo oule weemwedi 18, hano odula neemwedi hamano. 

Ndakalako ota kala modolongo mOlunho Correctional Facility. 

-wakudumoauleria@gmail.com