Jazema Hangero

Ondera aihe i nongamburiro movivava vyayo opu i zokutuka! Momuano tjingwewo okaṋepo kotjira tjOswanu, Kueekuje Kazapua, u nongamburiro yokutja ovature va tjOmbinḓe na Eisepa tji ve mu toorora arire omunane wavo omarundurukiro ngu va undja rure me veyetere. 

Ondungiro nomekurisiro ongendo morukondwa rwa Maheke, tjinene mOtjombinḓe tjokehi, na Eisepa na mozondendera za Kaṱumba. Omaṱunḓu omengi ye undja kovikurya vyourumbu tjazumba ouhepe woviungura komitanda ongendo. Kazapua ma zeri okuyenenisa onḓero nozongondjero zokupakura Oeisepa kOtjombinḓe kokutja tji rikuramene otjokarukondwa komatoororero ku tjo otjini. Onḓero ye okuzikamisa ombwiko yotjiwaṋa ndji mai vatere nozoprojeka nḓu maze tutumuna ehupo rovandu pendje nokuundja kohoromende tjinene. 

Okutungisa ozonganda zomahongero woviungura vyokomake, ovikunino vyotjiwaṋa, omatuwo womara wovahongwa pamwe nokuyeta orutjeno rweyuva oozondanḓo nḓeri momuinyo we. 

Okuyera onḓengu youveruke novipangero oomukambo omutenga mbu ma zeri okutoora tjinga amu novipangero oviṱiṱi motjivaro. Tjimwe mOtjovazandu (Talismanus) tji tja tungwa komurungu wongutukiro na tjimwe tji tjiri mOisepa Omurongo (Oeiseba 10). Noondarire kutja mOhelena na Donkerbos mu nozosikore, ovahongwa ve hepa okuyenda kEpako okukamuna omapangero nu ve hepa ovitoore. 

Ouvi wozondjira, omakondikaneno worutjeno, noungundipare wotuhungu ku remanisa ozonganda zoviungura novirandisiwa (ozongetjefa) nawina omahongero. 

Kazapua we rihonga oveta ponganda onene yomahongero wokombanda indji Ounama nu nai u ryamisa omahongero we komurungu movyoveta. Wa kara moviṱo ovingi vyomananeno okuza koumutanda we. 

Wari Otjiuru otjinane tjomitanda vyombongo ya Afrika; Omuhungirirepo womitanda vyotjira tjOswanu nu nai Omutjangerepo wovayandjandunge movyoveta motjira tjOswanu.