OKONGO – Osikola Nangolo Mbumba yi li mOkongo moshitopolwa shaHangwena oya mono oongulusikola oompe dha tungwa kepangelo, konima ya kala nokulongela aalongwa mootenda nomiipeleki. 

Minista gwomauyelele nomakwatathano gwopaungomba Emma Theofelus ngoka a patulula pambelewa oomboloka mbali dhoongulu okwa ti kape na nando okanona Okanamibia ke na okumona iihuna ngele tashi ya kelongo. 

“Aalongwa ohaya lesha nawa ngele ye li wo pehala tali etitha oonkondo notali monika nawa lyo lyi na iilongithomwa ayihe ya pumbiwa,” ta popi ngaaka. 

Theofelus okwa popi kutya elongo olyo oshipatululo shonkalamwenyo ya kehe gumwe, onkene okanona Okanambia oka pumbwa elongo okuza petameko opo ka longekidhe onkalamwenyo yako. 

Omukuluntusikola posikola Nangolo Mbumba, Lazarus Shapwa esiku ndyoka okwa popi kutya osikola ye oya kala yu udha iipeleki oshoka oongulu inadhi gwana. 

“Omwaalu gwaanona otagu ende gu uka komeho omumvo kehe, sho osho shoka oongulu dha li dha shonopala. Nuumvo otwa gwedha ko ondondo 11,” ta fatulula ngaaka. 

Shapwa okwa pandula epangelo sho lye ya yambindhindha noongulu ndhoka, ta ti odha kandula po omukundu lela. 

Uuministeli welongo, uunkulungu nomithigululwakalo owa ti konima wa mana okutunga oongulu dhosikola dhi li 510 omumvo gwa yi, natango owa li wa tsikile okutunga oongulu dhi li 500 okupitila mehangano lyoAugust 26. 

Omumvo gwa yi uuministeli welongo owa li wa tameke okutunga natango oongulu dhi li 500, ongeyamakulo kompumbwe yoongulusikola noosikola moshilongo. 

Uuministeli owati epangelo olye ya po nondungethaneko yokugwedha po oongulu poosikola osho wo okutunga oosikola dhopetemeko, omolwuupyakadhi hau kala wa taalela aanona pethimbo taya tameke enongelo. 

Epangelo olye ya po nomushangwa ngoka gwa totonona mo omaupyakadhi agehe ga taalela elongo, nuupyakadhi uunene owa li wa ndhindhilikwa wekoloto lyoosikola osho wo lyoongulu moshilongo. 

-vkaapanda@nepc.com.na