Taimi Haihambo
Outapi – Panduleni Mondestus omunamido 20, omukalimo womOkafitu kaKafimbi moshitukulwa shaMusati, okwa ti okwa kala needula omulongo ena oudu wokulidengapo oo haumu etele a pofipale oule wetundi donhumba nokudimbwa osho ali taningi.
Mondestus vati oha fikola pofikola yaNgolo Combined School, ashike elihongo laye oli li konima yovanhu vepipi laye shaashi opo e li mondodo onhimuwoi.
“Ouyehame owa kala noku hepeka nge unene eedula dihapu. Oupyakaidi osheshi kutya ohau dulu oku hanga nge kofikola ile meumbo nohashikala shapiyaana ngeenge nda tameke pehena etonatelo lomukulunhu,” ta ti.
Ngeenge ngeenge okwe li denge po e li kofikola, eshi taka tukuluka po oha fikama po ashike ndele oilonga yaye yofikola tei fiye po, nomongulu tadi mo.
Va ti ova ninga eenghendabala mofamili yokuya keendudu, koshipangelo oshoyo kongeleka ndele kashina eshi shakwafa vati.
Titus Natalia omukulu waMondestus okwa ti vati voo naMondestus ovashaa lapo kuina manga vali vanini.
“Ame ondali ashike ndina eedula mbali omanga Panduleni ena eemwedi mbali. Konima eshi meme a xulifa otwa kufwa po kutatekulu ou tetufile oshisho ashike onghalo kaipu,” Titus ta ti.
Onghalo ei natango oya kaninga oshimbide shakula melihongo laTitus vati, yoo oyo ya etifa aka dope ondodo o11.
“Mokukala ndina onghalo yokandenge kange taka vele ngaha, osha fininikange ndi kakonge oilonga pokafitola kamwe, opo ihandi mono po sha lela shiyamba, opo ndi dule oku yambidida okandenge kange,” ta yelifa.
Vati eshi ngeno ta ongele po oshimaliwa opo adule oku lishuna mofikola koo okandenge otaka ombokelwa. Onghalo ei vati ohai mu fininike a ka kufe oihauto momutumba opo a dule okutwalwa kandenge moshipangelo.
“Ngeenge twa monopo omunamutimanghenda oha dulu ngaho oku tupula oN$150 ashike osha pumba nee. Luhapu ohatu futu ashike N$200 ile oN$300. Oimaliwa ohai kala ihapu ndele name ihandi fyaala po va li nasha shakola shomondajato, ta ti.
Ovakwanedimo ava otava indile omakwafo koshiwana shiva kwafe apa tashi dulu, kutya nee omukalalo woshimaliwa, oikulya, omakwafo ouhaku ile oku tembulwa po pofikola apa pena Mondestus. Otava monika ko+264 812680 568.
taimihaihambo2000@gmail.com