Auleria Wakudumo

Taimi Haihambo

Ovanhu vanhe, mwa kwatelwa okaana ova xulifa mOshitukulwa shaShana moiponga ine ya yooloka. Oshiponga shimwe oshosho sha twaalela omwenyo wokaana kodula imwe eshi vati ka wila mevela lomeva. 

Oshiningwanima eshi osha ningilwa momukunda Oshanawa mOngwediva, Etitano lwopo 13h11 lwaapo.  Nakufya okwa tongololwa oye Ndinelao Bonifacio, omukwashiwana waAngola. Edi oda kolekwa komupopiliko wopolifi moshitukulwa shaShana Frieda Shikole. 

Otaku hokololwa ina yonakufya a fiya evela lomeva podje konima yokumopa monduda ndele ta yi nomona kepata oko okaana keli vaka ina ndele taka yi kevela lomeva omo ka xulifila. 

Opolifi oya ti ina eshi aka dimbuluka kutya okaana okeli vaka po puye, okwa hanga nale ka xulifa.  Oshiningwanima shikwao, opolifi moshitukulwa shaShana otai kongo ovakwanedimo vomulumenhu weedula 31, omukwashiwana waAngola oo a xulifa eshi a wila mondobe yomeva. 

Otaku hokololwa oshiningwanima eshi sha ningilwa momukunda Oshaanawa moshikandjohoololo shUukwiyu Uushona moshitukulwa shaShana.  Nakufya okwali omutonateli weengobe momukunda Oshaanawa ashike okwa yambukile momukunda Okaholo popepi nOmongwa moAngola. Opolifi oya holola kutya omulumenhu ou okweli xula okumonika Etinhe eshi vati vali tava nane mo ongobe monhopo navakwao vamwe. 

Konima yokukufa mo ongobe, okwali vati a kanyatela eenhata koikutu nokulutu ndele ta tokola ekeli koshe eenhata mondobe ili popepi opo vakwao vemu fiya. 

Ovaneumbo ova yongola nakufya vati Etitano kutya ina alukila keumbo okudja koufita wEtinhe. 

Otaku hokololwa kutya ovemu ya mokashoko fiyo taveli tu eenghaku noikutu yaye petale. Olutu laye ola hangwa la kaama kombada yomeva. 

Ovanemumbo ova lombwela opolifif oyo yeya okumukufamo olutu laye momeva.

Ovakwapata vanakufya vati ina shiivifilwa fiyo opapa shaashi vati kave shiivike. Natango omulumenhu weedula 66 oo ali omushingi wohauto yoN2831L Toyota itoka, omukalimo wokOmagongati mOshana okwa xulifila moshiponga shohauto. Omushingi vati okwa nyengwa oku pangela osheendifo fiyo outwa tai mudulu eenghono nokumuumbamo, ndele taxulifile poshiningwanima

Oshiningwanima shikwao osha ningwa mEtitano omo Omunamido 61 Jacob Iipinge a xulifa eshi ohauto yaye yeli denga omutwe nomutwe nosheendifo shikwao. Otaku hokololwa motwawa yaIipinge mwali omukulukadi waye womido 51, nomutwaalelwa mukwao womido 41. Ava aveshe vavali ova xupa moshiponga eshi nouponga vanini. Oshiponga eshi osha ningilwa mondjila yopokati kOkahao nOshakati, pefimbo Iipinge novatwaalelwa vaye vali tava di kohango kOshitayi.  Motuwa ikwao omwa mona oshiponga omulumenhu womido 26 oo a li ta shingi osho yo ovatwaalelwa vaye vavali – umwe oku na omido 33 namukwao oku na omido 34. Oihakanwa aishe moshiponga eshi oya tambulilwa moshipangelo shepangelo mOshakati.