ONGWEDIVA- Omupresidente Netumbo Nandi-Ndaitwah okwa ti okwa hafa unene oshoyo okupandula ovanyasha shaashi eepelesenda 60% dovanyasha otava kufa ombinga komaulikilo oipindi a Ngwediva.
Okwa ti natango okwa pandula ovakainhu eshi eepelesenda 70% dovakainhu tava kufa ombinga komaulikilo oipindi kOngwediva.
Omupresidente okwa li ta popi kepatululo pambelewa lomaulikilo oipindi aaNgwediva mexuliloshivike.
Omaulikilo oipindi okwa tameka momafiku 22 notaa xulu momafiku 30 omwedi ou.
Neudo ovanangeshefa va kula mwa kwatelwa va shona 450 otava kufa ombinga komaulikilo oipindi.
Ovanangeshefa 26 va dja kondje yoshilongo ngaashi Tanzania, Kenya, Ghana, Zimbabwe, Indonesia, Botswana, and South Africa navo otava kufa ombinga koipindi ei.
Okwa ti eshi otashi ulike oukumwe pokati koilongo ei ngeenge tashi ya poipindi.
Nandi-Ndaitwah okwa pandula elelo lodoolopa yaNgwediva eshi ta li longo nelitulemo noukumwe okuunganeka omaulikilo oipindi omudo keshe.
“Omaulikilo oipindi otaa etele oshiwana eemhito doilonga noyuuyemo yoshimaliwa. Oipindi nai twikile komesho keedoolopa da yooloka,” ta ti.
Okwa ti otashi ulike efano liwa ngeenge ovanyasha tava kufa ombinga komaulikilo oipindi shaashi otashi va kwafele okulwifwa ondjala oluhepo.
Omupresidente okwa ti ouministeli womangeshefelo noikwamina otau ka enda koitukulwa ya yooloka okuninga omapekapeko nghene ovanyasha tava ka yambididwa okutota po eengeshefa davo.
Okwa kumaida ovanyasha opo va yandje ouyelele womondjila pefimbo lomapekapeko tau ka ningwa molwashi osha fimana.
“Ngaashi naana nda udaneka kutya ovanyasha otava ka pewa oshimaliwa nelalakano lokutota po eengeshefa davo mwa kwatelwa eepoloyeka,” ta ti.
Nandi-Ndaitwah okwa ti osha fimana ngeenge ovangeshefa tava longele kumwe okutopolafana omayelele nghene va na okuyambula po eengeshefa davo.
“Natu kaleni tuna oukumwe nombili shaashi otashi tu kwafele tu yambale po eliko loshilongo shetu,” ta ti.