OIKOKOLA- Minista womauyelele, omakwatafano opaungomba Emma Theofelus okwa ti epangelo ota li shi endifa nawa okuyandjaneka omatenda omakwatafano eshi oshivike sha djako omatenda 25 okuyandjaneka onetiweka a tulwa koitukulwa ya yooloka.
Minista okwa li ta popi oshivike sha djako pefimbo ta patulula pambelewa etenda lomakwatafano komukunda Oikokola moshikandjohoololo shaEtayi kOmusati.
Omatenda ayeshe okwa tungwa kehangano loPowerCom kongushu yoshimaliwa eemiliona N$1.6. Okwa ti yelifa ta ti keedoolopa okwa tulwa omatenda omakwatafano aahapu molwashi oko unene kwa didilikwa kuhadi omwaalu muhapu wovanhu okufafanifa nokomikunda.
“Paife ovanhu vahapu tava i keedoolopa tava fiye po omikunda tava ka konga oilonga unene tuu ovanyasha. Naashi osha eta opo omwaalu wovanhu keedoolopa tau ende wau ka pombada efiku keshe,” ta ti.
Minista okwa yelifa ta ti ngeenge tashi ya pokuyandjaneka omatenda omakwatafano oitukulwa aishe otai tulwa mwa kwatelwa komikunda.
“Otwa didilika komukunda ku na ovanhu va taalela omashongo okuhe na omatenda omakwatafano osho shi li shi djuu shaashi ihava dulu okudenga ongodi ile okutuma omatumwalaka shaashi ka pena onetiweka,” ta ti.
Theofelus okwa ti etenda olo la tulwa kOikokola ota li ka etela oshiwana ouwa molwashi paife otashi dulu okulongifa omakwatafano opaungomba okuya komalungula.
“Eefikola oupangelo paife ita di ka longa vali noudjuu molwashi ove li popepi netunda lonetiweka,” ta ti.
Maria Kafine omukalimo womomukunda Oikokola okwa ti paife otava ka longa noupu ngeenge tava denge eengodi oshoyo okuya komalungula.
“Otwa pandula epangelo letu. Nale okwa li hatu mono oixuna shaashi ka kwa li hatu dulu okudengela ovanhu ongodi ile okutuma omatumwalaka,” ta ti.