Auleria Wakudumo 

ONGWEDIVA – Omaulikilo oipindi aNgwediva oo a tameka Etitano otaa ende nawa. 

Omaulikilo oipindi ohaa hanganifa ovanhu okudja keenhele da yooloka moshilongo osho yo kondje yoshilongo. Kakele koipindi, omaulikilo oipindi ohaa ulike nokuhanganifa omifyuululwakalo da yooloka nokukufa ombinga momalihafifo a yooloka. 

Okudja nghene ya tameka, onhele oya pakela ovatalelipo okudja kombinga oyo hai kala ovanyasha vahapu hai ifanwa Katutura oko haku landifwa ombelela ya yofwa osho yo omalodu ongolo wa uka meengulu domaulikilo oipindi omo hamu kala unene omahangano epangelo osho yo omalelo edoolopa a yooloka fiyo okonhele yokudanaukila ounona nokonhele yomalihafifo. 

Ovalandifi otava landifa konyala keshe shimwe okudja kombelela, oukuki, oifima noukunwa osho yo oikulya younona, omalodu ito mane kuvalula noikulya yOshiwambo. Ngeenge owa tale nawa, oto mono ovakwanedimo va tula ounona vavo komesho opo ve uye okutyapula omaulikilo oipundi. Sophia Shilongo, umwe womovalandifi voikulya yOshiwambo okwa holola kutya iha efa omaulikilo oipindi taa ningwa mOwambo ile koushimba a pite ina landifa oilandifomwa yaye. 

Kakele komaulikilo oipindi aNgwediva, Shilongo okwa ti okwa enda oipindi yaWalvis Bay, Windhoek Show Ground, Oranjemund, Luderitz neenhele dihapu mOwambo. 

“Ohandi pandula shaashi ovanhu ove ya momwaalu muhapu neudo okulanda oikulya yOshiwambo. Omaulikilo oipindi mOwambo oku dule moushimba shaashi omu omu na ovanhu vahapu ovo ve na ohokwe noikulya yOshiwambo,” Shilongo ta ti. Omaulikilo oipindi aNgwediva neudo oku na ovalandifi ve li 480, mwa kwatelwa ovanangeshefa vashona, oikondo yepangelo ya yooloka, oiputudilo yehongo oshoyo omahangano omaumwene. Ovashingifi veengeshefa okudja kodje yoshilongo ngaashi Ghana, Japan, Germany, Indonesia, South Africa naikwao ya wedwa po navo otava ulike omifyuululwakalo davo odo da yooloka komifyuululwakalo daNamibia. 

Neudo, omaul ikilo oipindi aNgwediva okwa patululwa pambelewa kOmupresidente Netumbo Nandi- Ndaitwah. 

-wakudumoauleria@gmail.com