Auleria Wakudumo
Ehangano loMobile Telecommunications hano MTC onghene tali twikile okukunghilila oshiwana shi kale oupafi noshi lungamene oulingilingi oo wa duva, unene tuu oulingilingi woshimaliwa hau ningwa melongifo ledina la-MTC.
Omupopiliko wa-MTC John Ekongo okwa denga omufindo kutya MTC oku na ashike onomola imwe oyo hai dengele oshiwana ngeenge va vena sha ile tava pulwa ouyelele wonhumba wa wedwa po.
“Nande tu na onomola yokudengela oshiwana, ihatu denge tu pule ouyelele umwe uhe fi edina loye. Ohatu denge ashike opo omunhu a koleke edina laye.
Ngeenge ope na shimwe sha pumbiwa, ohatu lombwele ovayakulwa ve uye kombelewa,” Ekongo ta ti.
Ekongo okwa indila ovakwashiwana va koneke onomola yaMTC- 081 888 2000 nokukala ve i na meengodi davo. Molwokatoo oko ka hapupala paife, Ekongo okwa ti osha fimana okukopela onomola ya-MTC ngaashi ovanhu va kopela onomola yopolifi nadikwao da fimana, opo u lihape okuninga oshihakanwe.
Ekongo okwa kunghilila oshiwana opo shi kwatafane nopolifi meendelelo ngeenge oshe lihange sha kanifa oimaliwa momukalo wa tya ngaho.
Omupopiliko okwa yelifa kutya MTC iha yandje ekwafo lotete ngeenge tashi ya komunhu a kanifa oshimaliwa momukalo woukengeleledi nonande omunhu a longifa edina laye.
“Ohatu indile oshiwana shi kale hashi lotokele kopolifi tete, opo shi tule mo oshibofa osho tashi dulu okupa opolifi eenghono dokuya komhangu nokupewa epitikilo olo tava eta ku-MTC opo tu tale kutya onomola oyo ya ninga oulingilingi oyalyelye,” Ekongo ta yelifa.
Ekongo okwa twikila nokuyelifa kutya kape na ou e na oufemba okupitifa ouyelele womunhu ngeenge oveta inai ya mo onyala moshikumhungu omo.
“Onghene oshinima shotete u na okuninga ngeenge wa ningi oshihakanwa shokatoo, okuya kopolifi meendelelo opo omufekelwa a kondekwe meendelelo,” ta holola.
Ekongo okwa yeleka yo omapopyo okulishangifa oukalata kutya itaa ti kutya MTC ota ka yandja ashike ouyelele kombinga yomunhu wonhumba kukeshe ou te u pula. Okwa ti natango ota shikula oveta ngaashi sha kala po nale.
Nande ongaho, Ekongo okwa ti omukalo ou owa shunifa oimbuluma pedu. Natango, eshi osha ningwa melongelokumwe nopolifi.
“Oibofa youkengeleledi oya shuna pedu neepelesenda 20 okudja eshi oukalata ve lishangifwa. Eepelesenda edi oda li pombada neepelesenda tadi tengenekelwa po64,” Ekongo ta ti.
-wakudumoauleria@gmail.com