Taimi Haihambo

ONGWEDIVA – Lavinia Gabriel omunamido 80 okwa ti okwa waimina oipindi yokuma oitoo nomatiti mo 1967, manga a li okaadona.

Gabriel vati tete okwa li e hole okuhondja, nokonima okwa ka wila mohole nokuma oiyuma.

“Ame ngeno kapwa li oiyuma ngeno ihandi djala voo nounona vange kave na apa tava xupu,” ta ti.

Vati mongeshefa omo a kala ha futu eefikola dounona, ye ta lande omalwishi omoubaki osho yo oku va landela oidjalomwa.

Okwa ti ye okwa longa eedula dihapu lela, nongeshefa yaye vati oya shivikilwa nawa moong moshitukulwa shaMusati. 

Ashike nande ongaho, natango oha kala vati a taalela omashongo ovanhu tava sheke oihongomwa yaye taku tiwa inai longwa shili momake, vo taveli hongolola vahe ilande.

Okwa twikila kutya meedula edi e li paife nado oda ninga yo dihapu do nheenghono doilonga yaye paife otadi shuna pedu, onghee okuhonga oiyuma nako okwa saka kashona.

Gabriel oye umwe womwaava tava kufa ombinga momauliko opaipindi, ashike okwa a pandula lela shaashi vati ohaa eta shihapu lela mondjato yaye, sho osho hashi mu tu omukumo wokukufa ombinga keshe odula. 

Okwa twa omukumo ounona ava ve li momaumbo va dopa eefikola ve lihonge nande okuhonga oiyuma opo va dule okulimonena po sha shomondjato. 

Oilonga yoludi eli vati kai shi ashike yoomeme, ndele nootate otava dulu okukufa ombinga nawa.

-taimihaihambo2000@gmail.com