Auleria Wakudumo 

ONGWEDIVA – Ouministeli woikwameni neameno lokeengaba owa yandja oufemba kovanhu ve dule po2 578 momaulikilo oipindi aNgwediva okudja eshi omaulikilo oipindi a hovela momafiku 22 Auguste fiyo Olomakaya lomafiku 30 Auguste 2025. Ovakwashiwana vomoshitukulwa shaShana osho yo oitukulwa ikwao ova kala nokuholoka momwaalu muhapu okulishangifa osho yo okwiila ko omaufemba avo. 

Ouministeli owa li wa eta omayakulo ao aeshe momaulikilo oipindi aNgwediva okudja kokulishangifa eendjapo domadalo, oumutwe voshilongo, okukufwa omanyala, okulishangifa oukalata vokondje yoshilongo, okufanekwa osho yo oku ka tala ko omaufemba avo monhele omo tuu omo, naikwao ya wedwa po. 

Omupopiliko wouministeli woikwameni Margaret Kalo okwa holola olupandu kovakwashiwana eshi va holoka momwaalu muhapu. 

Kalo okwa holola kutya keshe omukwashiwana Omunamibia oku na oufemba a kale e na oufemba woshilongo. 

Ouministeli woikwanemi owa yandja yo ouyelele kovanafikola okudja keefikola da yooloka kombinga yefimano loufemba woshilongo osho yo oku va shivifila omakwafo oo haa yandjwa kouministeli komalungula. 

Ovahongwa unene ovo ve li meengudu dopombada ngaashi mondodo 10,11 osho yo ondodo 12 ove lishangifa oumutwe voshilongo opo va dule okunyola ekonakono laxuuninwa lokomudo. 

Mokati kaavo ve ya okulishangifa oufemba, omukulupe weedula 101 okwa li a holoka novatekulu okushangifa opo a mone odjapo yedalo yokatekulu shaashi oyo ka li ke na nale oya kana. 

Eshi otashi holola kutya ovanhu vahapu mokati ketu ov ena ehongo kombinga youfemba woshilongo nove shi efimano lao. Omupopiliko wouministeli okwa indila ovo ve lishangifa ashike inava mona omhito okwiila ko omaufemba opo va kwatafane mombelewa yavo mOshakati. 

“Ovakwashiwana otava indilwa opo va kwatafane neembelewa doikwameni odo va tula pomaindilo avo opo va mone oufemba wavo,” Kalo ta holola. Ouminsteli owa holola yo kutya owa pondola okuyandja omayakulo oufemba woshilongo kovanhu ve fike po22 401 okudja koitukulwa 11 yoshilongo. 

Omwaalu ou vati owa pitilila omwaal tengeneko wavo, oo wa li 16 000. Oshitukulwa shaTjozondjupa osho she lishangifa ovakwashiwana vahapu, ve li 5 305 taku shikula oshitukulwa shaMusati, ovanhu ve li 3 482 omanga Oshikoto nErongo va shangifa omwaalu wopedu. 

Oshikoto osha shangifa ovanhu 363 omanga Erongo la shangifa ovanhu 506. 

“Eshi otashi holola kutya ouministeli owe litula mo okweeta omayakulo avo popepi noshiwana nokukwashilipaleka kutya keshe omukwashiwana waNamibia oku na oufemba,” Kalo ta ti ngaho. 

-wakudumoauleria@gmail.com