Auleria Wakudumo 

Endiki lo!Nknongo momukunda Ongula yaNetanga moshitukulwa shaHangwena ola patululila omivelo ovanyasha ovo ve li konima yefiya okudja koitukulwa ya yooloka. Ovanyasha otava pewa ehongo nowino moilonga yokomake osho yo oilonga yokuyandja ekwafo lopombada mokulonga meekefe. 

Endiki eli ola tulwa moilonga odula ya dja ko okudja koshitayi tashi ifanwa oHomestead Skills and Technical Education Academy (HSTEA), hano oshiputudilo shokuyandja omadewo moilonga yokomake ile yomeumbo ngaashi okuma oiyuma. 

Endiki eli olo lotete moshilongo tali yandje la tula eemhumbwe dovanyasha ovo ve li konima yefiya osho yo ovo ve li moluhepo komesho. 

Otali lalakanene okukwashilipaleka kutya kape na omunyasha ta fyaala po molwomunghoko waye, kashona aka e na po ile ehe na sha nande nande. 

Oshiputudilo sho-HSTEA osho sha dala endiki tali ifanwa o!Nknongo olo ola patululwa pambelewa momudo 2018 momukunda Ongula yaNetanga moshitukulwa shaHangwena. Oshiputudilo otashi lalakanene okutwa omukumo nokuyandja owino kovanyasha opo va kale tava dulu okulilongela kuvo vene nokumona oyuuyemo. 

Oshiputudilo eshi osha hovela okuyandja omadewo mo2019, va tameka okuyandja owino mokulongela meekefe nokulonga novatalelipo, okuhondja, eengeshefa, eeshi nounamapya. 

Mo2023, HSTEA okwa patulula omivelo daye mOkongo eshi a patulula endiki tali ifanwa o!Nknongo Community College. 

!Nknongo oku na eenhele mbali mOkongo odo a tukulilafana ovahongwa vaye she likolelela kwaasho tave lilongele. 

Onhele imwe oyi li monhele yomangeshefelo modoolopa yaKongo. Ei ohai tambula ashike ovahongwa ovo ve na odjapo yondodo 11 no12. Ovahongwa ohave lilongele omaifano ngaashi okuyakula meekefe, okulonga novataleipo, okuhondja osho yo okulundulula oitwa yavo yondodo 11 no12. 

Omanga ikwao i li monhele yomatalelepo mOkongo. Omu, ovahongwa ohava pewa owino mokushikula oinamwenyo yomofuka mokashoko, oukongo, eengalo dOshiafrika naikwao ya wedwa po. 

Mo29 Sepetemba 2025, endiki eli ola li la talelwa po kOmuprima woshilongo Elijah Ngurare. Ngurare okwa li a holola etumba mokumona osho tashi ningilwa ovanyasha ovo ve li konima yefiya. 

Pefimbo ta talele po endiki eli, okwa pandula ovahongwa ovo va dja koKhwe koshikunino shoinamwenyo shaBwabwata nonande va taalelwa komashongo mahapu. 

Omwedi wa dja ko, endiki ola tambula ko ovahongwa ve li 15 ovo ve li momhumbwe okudja koitukulwa ya yooloka. Ovo va tambulwa omwa kwatelwa ovahongwa vatatu okudja koSheya shUushona moshitukulwa shaMusati, vatatu okudja mOkongo, vatatu okudja koHai//om moshitukulwa sha//Kharas navaheyali okudja koKhwe moshitukulwa shaKavango East. 

Ovanyasha ava paife otava mono ehongo nokupewa owino mwaaishe oyo va li va kala va hala okulihongela oule wefimbo molwomaimbo onhumba nongadi. 

Eetundi davo otadi ka futwa kehangano loNamibia Training Authority (NTA) osho yo okufuta omihandjo davo noipalwifa oule welihongo lavo. 

Ovanyasha unene ovo ve li momhumbwe otava indilwa opo va ninge omaindilo omudo tau ya. 

-wakudumoauleria@gmail.com