OMUNDAUNGILO – Omupilima Elijah Ngurare okwa ti epangelo otali twikile okuyandjaneka omeva komikunda koitukulwa ya yooloka shaashi osha fimana ngeenge oshiwana tashi nu omewa ayela. “Omeva okwa fimana kovanhu, oimuna osho yo okutekela moikunino,” ta ti. 

Edi Ngurare okwe di popya oshivike sha dja ko pefimbo ledimbuluko lefiku lomapendafule la li kOmundaungilo moshitukulwa shaHangwena. Okwa ti omapendafule okwa fimana molwaashi okwa longa noudiinini pefimbo loita nelalakano opo Namibia a kale a mona emanguluko. 

Okwa lombwela oshiwana opo shi kale sha fimaneka omapendafule shaashi ngeno kama li po ngeno Namibia ina manguluka. “Efiku lomapendafule ola fimana mondjokonona yaNamibia naashi osha eta opo li kale hali dimbulukiwa efiku keshe,” ta ti. Nguarare okwa weda po ta ti Ovanamibia nava kale ve na oukumwe nombili shaashi paife oshilongo osha manguluka. 

Okwa denga omufindo ta ti epangelo ole shi pondola okukala la kandula po omukundu wovanhu hava ka teka omeva kokule eshi la tunga eemboola. 

“Otwa didilika kutya oshitukulwa shaHangwena nOshikoto oyo imwe ya didilikwa ya kala i na omukundu wovanhu tava ende oshinano shile oku ka teka omeva kokule,” ta ti. 

Omupilimaminista natango okwa ti epangelo ola tunga eefikola noupangelo komikunda osho yo okuyandjaneka omatenda onetiweka nolusheno. 

Okwa yelifa ta ti ngeenge tashi ya pamayakulo oshiwana epangelo ole shi pondola okuyambidida oshiwana. 

-fhamalwa@nepc.com.na