Omulumenhu weedula 52 okwa monifwa oshiponga kunyamunghwao pefimbo kwa li tave lidengele keumbo lomukainhu wavo. 

Otaku hokololwa kutya ovalumenhu aveshe ove li mekwatafano lopaihole nomukainhu umwe. 

Oshiningwanima osha ningwa Omaandaxa efimbo lwopotundi 23h00 loufiku komukunda Ohaamala moshitukulwa shaHangwena. Sergeant Simeon Haufiku ta longele mombelewa yokuyandja ouyelele mOhangwena okwa hokokola ta ti ovalumenhu ava ova shakena keumbo lomukainhu ou. Opolifi oya hokolola tai ti nakutetwa nekatana okwa tambulilwa moshipangelo shEenhana ta mono epango lopaunamiti shaashi okwa monifwa oshiponga. 

Otaku hokololwa omulumenhu umwe okwa dja komukunda Eembidi omanga umwe oha di komukunda Ohaamala. 

Opolifi oya ti omufekelwa ou a teta nyamunghwao nekata okwe va hanga monduda yomukainhu oo, ndele tava tameke okutanguna. Omufekelwa okwa kwatwa po nota holoka momhangu nena yamengestalata waHangwena. 

Opolifi oya hokolola tai ti omukainhu oo ina dengwa ashike okwa pendula ovaneumbo pefimbo ovalumenhu vaye tave lidenge. 

Omupopiliko welelo laUkwanyama Andrew Naikaku okwa ti osha puka komukainhu ngeenge e li mohole novalumenhu vavali ile ve dulife po. 

“Otashi dulu okueta oshiponga nomafyo. Osha nyika oshiponga neenghono,” ta ti. 

Okwa kumaida ovanhu opo va xulife po okukala mekwatafano lopaihole nonduba yovalumenhu shaashi osha puka. “Ovakainhu nave lifimaneka ndele tave lidinikile omulumenhu umwe,” ta ti. 

Okwa yelifa ta ti itashi ulike efano liwa ngeenge moshitunda shaUkwanyama tamu longwa oimbuluma. 

-fhamalwa@nepc.com.na