Kaino Sheehama
Nguuru gwanare gwaOhangwena Usko Nghaamwa katumbwidilire erudiko lyomoOutjo asi tagavako yimaliwa yokusika koN$200 000 eli lina kukarako lina kara asi marandesero ntani vadinguli mo mvhura 2025 omu nayigava kupitira moaccount zomukurona godoropa. Nghaamwa ogu twadiva asi age kwahara kugava, katumbwidilire yimaliwa eyi pomurarero ogo kavakere nago moutano moOutjo.
Omu vana kukaziturapo nositurwapo asi ‘’ Tjingisa Outjo zikare doropa ezi nava wiza vapinguli omu navayaruganena kumwe novatungimo, vamwe kavakerepo kuna kara, mukarelipo gwaNamibia gwanare Amb. Elia Kaiyamo ntani nguuru gwanare gwaKunene, ano ngesi silyo sombongarero zanavenye Marius Sheya. Mononkango dedi kahuyungire, katente asi age ana hafa ntani kayimutetukisire, apa nye kagwene mbapira zezigido, nokutanta asi age nomutjima gwendi nagunye ana tambura mokukara patron gosilika esi ngasi karako moOutjo. Age posiruwo simwe sanare ngayarugana moOutjo ngomurugani koyirumbu yakeremo nokutanta asi magwanekero gendi nodoropa zaOutjo simpe pogeli. Age kuna kuhundira womvharerwa asi vahepa kugwanekere nokuvatera epangero mokutulisapo makuliko gosirongo, nokudiworokesa asi Namibia kwahamena kovaNamibia navenye. Age simpe kahundilire vaNamibia asi vahepa kulivatera vene navene, vahana kutara asi ntundiliro kupi. ‘’Tuzeni turuganene kumwe asi vakuru novamumbya, yimo ana kutanta. ‘’ Yiyo nye nina kuhuyungira asi nsene tanihuyunga erongo, kuna kuhuyunga asi erongo lyovaNamibia navenye nkenye tupu muhoko ono kutunda. Makura ngoso tatutungu nye Namibia zetu, sirongo setu, natuvenye.
Gumwe gegendeso lyodoropa zaOutjo munasipundi gwazo Samuel !Oe-Amseb karuganesere mpito ozo mokuzigida vana ngesefa ntani nongesefa dopaumwene vawize vayapungure modoropa ezi. Nokutanta asi Outjo kwakara pevango lyewa unene, nokutanta asi modoropa kuna karamu noplot 7,316 edi dina kara asi nongwa unene komatungo gekuliko. ‘’ Ndango kapi zina kara noudigu moku zegurura nompito domaliyongo mokugava evhu eli valiruganese,’’ !Oe-Amseb yimo ngoso ana kutanta. Age simpe kahundilire nonkuru sure omu navagazara asi vayatulisepo nosure dangoso moOutjo unene dokulironga kuhamena vadinguli. Omu nye twazidiva omu azitambura vantu, Outjo kwakara asi evango lyovapunguli.
Ndango zodoropa kwapura asi tavagwana vapunguli wovawa unene, yipo tukulike doropa zetu. Murarero ogukagugwene mbatero, noyimaliwa yokusika ko N$531, 301. Yimaliwa eyi kuna yitambesere asi vahepa kukayiruganesa kezuva lyomatjingiso novadinguli zomo 2025, vanatumbwidire kukakarako kutunda mo 27 Sitarara dogoro 4 Sikukutu 2025. Kaino Sheehama mugavi nombudi koministeli zomapukururo nomagwanekero.