Ovitjitwa ovisopoke vyomayuva vyOruuano vyokuzemburuka ozombura o-70 zonḓikameno yaro vya patere Osondaha pombongo oini momuvanda Oephraim Hei mOkatutura mOtjomuise.

Oyo wina ndji tjiukwa otjOprotestant Unity Church. Ya patururire omukandi wayo imbwi kotjiveta Oritjatatu nda zuko, ongurova ya Ritjaine ependukirwa avi kayenda komurungu nongurova yongumbiro yovakazendu va Ritjaine. Oritjatano aku kara ongumbiro nambano yokuyakura ovimbumba vyombongo mouparanga wehi arihe nopendje yaro tjimuna kOtjauana. 

Ovinyoko vyotjikoro vyomazemburukiro inga pendje nomapatururiro wokotjiveta wa Ritjatatu oyo nga nanene ombango tjinene youṋepo wombongo oini ngandu kovazapamwe mongamburiro wozongombo zarwe tjimuna inḓa zehika rOnakapa, yari omakawondjero womomuvanda wongutukiro okuza motjihuro okuhova nawo okuza mOauspanplatz ngandu pOtre. Ovimbumba okuza mbo mu vya rondero momatemba ngandu pongomainde indji nguru yotjihuro ndjiri mOkatutura, rukwao pu vya hovere pehi momuvanda tjingewo wongutukiro ngandu tji mavi kavaza pombongo. 

Ovimbumba tji vya zire mbo pu vya ire ketuwo indi Onahas Angula rOjetu Jama. Kuwo nambano ku kwe kerikwambere nokurihoha iho otjikututundu tjombongo aihe novaṋangwa pekepeke, muwo mu mwari omuṋangwa omuhungire weyuva ngwa kuramenenepo otjiuru tjehi, Onongo Kaire Mbuende, eye wina nguri Otjiuru Otjipitise poo ohongora yOrupa rOmatyero wOviungura vyOmekurisiro Vyehi. 

Ngwari Omuhaamise wOmbongarero yOtjiwaṋa, Onongo Peter Katjavivi, nOrata yOkarukondwa kOmatoororero Komondivitivi ka Katutura, Rodman Katjaimo. Mbari kotjiriro otjitenga pu na omuhonge wombongo Vekarapo Upi nOmutjangerepo Omunene, August Karikuta Kahimunu.