Taimi Haihambo
ONGWEDIVA – Wilka Mukoya omunamido 26 okwa ti onghalamwenyo yaye inai xulila ondjilakati nonande ina mana elihongo laye lopombada.
Mukoya okwa ti yee omwene okwa li emufila onghenda eshi ali a mona omhito yokulihonga aye fiyo oko shiputudilo shopombada ashike, aishe ina ka enda vali ngaashi ali adiladila shaashi oimaliwa oya kala eshongo linene monghalamwenyo yaye.
Okwa ti onghalo oye mufindila opo awaimine mongeshefa yokuwapaleka oipala yovanhu, oku kosha eemhadi oshoyo oku painda ovanhu moipala.
Okwa ti nande akwatwa kediladilo loku tameka ongeshefa yaye, vati kashali shipu.
“Pefimbo nda kwatwa kediladilo lokutameka ongeshefa yange, kandali nda pyokoka nande nande. Kandali ndina oimaliwa kokutamekifa ongeshefa yawana nawa. Onda kala handi kala nda tila okuninga ovanhu omapuko moipala, yoi noilongifo yange ei handi longifa oku wapalekifa ovanhu, oya li ina ondilo,” ta ti.
Vati opo eshi endife nawa, shaashi ka li ena oimaliwa yokuya komadeulo ofaafaa, okwa tameka hatale ouvidio komalungula nghee ena oku wapelaka ovanhu, yee fimbolimwe teli hongele koipala yavamwaina ngeenge veli meumbo, fiyo ta endeleko tashiiva nawa.
Eshi aka tameka teshi endifa nawa nawa, okwa ti onghalo oyemufininika atameka oku kala haningi ouvidio voiyolifi komalungula, yee tashingifa ongeshefa yaye momukalo woludi olo, shaashi vati momukalo oo omo ashike ta dulu oku mona eecastoma. Komalungula vati oku liko ashiivika nawa nedina “Wilka Gee”.
Mukoya okwa ti nena oku li oshiima shakula moshiwana, nokuudite kutya okwa eta elunduluko moshiwana. Ongeshefa yaye otai ende nawa, nohalongele mOshakati nOngwediva.
Okwa twa ovanyasha vakwao omukumo ve li momaumbo, unene ngoo ovakainhu vatameke oku kala have lilongele voo vene. “Oku kala omutumba meumbo kakuna eshi taku eta. Tameka nakoshona aka unapo, ongeshefa yoye onai kakule ngaho fikulimwe ngeenge to longo nelitulemo.
Mukoya okwa ti shinasha naava vasholola koipala yavo ina eembulwa vehewete kutya otave iningi ngahelipi, ekwafo lavo ota veli hange kuye.
Okwa ti oku li mOshakati, ashike oha ende oshilongo ashishe takosho oipala yovanhu,eemhadi nai kwaao yawedwapo. Okwa ti ota monika ko 081 413 781 2.
-taimihaihambo2000@gmail.com