OHAKWEENYANGA – Omukondjelimanguluko osho wo omukuluntu gwetanga lyegameno kwa li Solomon Jesus Hawala, okwa fumbikwa mehuliloshiwike. 

Hawala ngoka a ningi konyala iiwike ine ta lilwa, okwa hulitha momasiku 11 gaAguste nokwa fumbikwa momasiku gahamano gaSepetemba, mOngwediva moshitopolwa shaShana. Okwa li e na omimvo 89. Hawala okwa pewa efumbiko lyopapanggelo nokwa li a thigi po etumwalaka kutya, ngele ta zimbuka, na fumbikwe kegumbo kOngwediva hoka ku na aakuluntu ye. 

Omupresidente gwoshilongo Netumbo Nandi- Ndaitwah esiku lyoshituthidhimbulutho okwa kumagidha oshigwana shi kale aluhe tashi simaneke omapendafule omolwiilonga ya longela oshilongo shika shi manguluke. “Natu kaleni tu na uukumwe uuwanawa, tu neni elongelokumwe opo tu vule okusimanekathana nuunene omapendafule ngoka ga kondjela emanguluko lyoshilongo,” ta kumagidha ngaaka. 

Amushangandjayi gongundu yoSwapo Sophia Shaningwa okwa dhimbulukwa Hawala onga kwa li omuntu gwaantu, kee na katango nokwa kala a dhama moSwapo noku yi longela uuwanawa. 

“Otatu popi ependa, tatu popi Hawala omulumentu ngoka a kala ta kondjele oshilongo shika sigo esiku lye lyahugunina. Okwa kala nokuiyambela oshilongo shika, opo shi manguluke,’’ ta ti ngaaka. Omukuluntu gwetanga lyegameno Martin Kambulu Penehas, okwa ti Hawala okwa thigi ko ondjokonona yiilonga yuupendafule ndjoka itaayi dhimbiwa nande. 

“Ethimbo lye a longela oshilongo shika olya ulike ohole e na naNamibia. Otatu mu dhimbulukwa sigo aluhe tse itatu mu dhimbwa nando,” ta ti ngaaka. 

Omukukadhi gweLaimi Hawala mondjokonona ye okwa ti ina kanitha ashike omusamane gwe ihe okwa kanitha kuume ke osho wo omukwathi gwe. 

“Omusamane gwandje okwa li e na eitaalo lya kola, okwa kala e na oshisho nohole nezimo lye, onkalo ye ombwaanawa oya kala ye tu kwatakanitha kumwe noku tu longa nkene tu na okwiihumbata monkalamwenyo,” ta ti ngaaka. 

Oyana oya dhimbulukwa he ongomulumentu gomatumbulo omafupi ihe ayihe ohe yi gwanitha po. 

“Okwe tu putudhila omikalo, nonando ka li he tu dhenge komalutu, ngele twe mu tala koshipala she, ot shi shi nale kutya ope na sha shimwe kaashi li mondjila,” ta popi ngaaka.u Taya ti he okwa li ehole uunafaalama nuunamapya, nethimbo olindji sho a li a yi moshipundi shevululuko okwa li ha kala unene kofaalama ye. Ya gwedha ko kutya he okwa li omuyogoki, ka li e hole oongaga, naasho a li a ningwa mwene gwomukunda Ohakweenyanga okwa li ha longekidha omasiku gokoopaleka omukunda. 

Hawala okwa thigi ko omukulukadhi gwe Laimi Hawala osho wo aanona yahamano. 

-vkaapanda@nepc.com.na