ONDANGWA – Minista gwomayambulepo goondoolopa niitopolwa yokuushayi James Sankwasa okwa ti aaleli yopamithugululwakalo ihaya ulikwa ashike mombepo, ihe ohaya zi momazimo gooyina mboka taya lele nale.
Sankwasa ndhoka okwe dhi popi esiku lyomutumba gwokomumvo gomalelo gopamuthigululwakalo omu-26, ngoka gwa tameke momasiku gahetatu tagu hulu momasiku12 gaSepetemba.
“Omayipumwemomumwe otaga holoka momalelo gopamuthigululwakalo gamwe oshoka aaleli inaya za momazimo moka y ena okuza opo ya lele,” ta popi ngaaka.
Ta ti okuza nkene oshilongo shika sha mangulukile, omayipumwemomumwe oga kala taga indjipala, ihe shoka ngele otashi tsikile omayambidhidho okuza kepangelo otaga ka kala uupyakadhi.
Ta gwadha po kutya ye ita longo nomayipumomumwe osho wo omaupyakadhi nokwaatsa kumwe kaaleli momalelo gopamuthigululwakalo.
“Onda inekela kutya nguka otagu kala omutumba gwahugunina okugongela omalelo gopamuthigululwakalo okukundathanwa omaupyakadhi ga taalela omalelo gopamuthigululwakalo ga yooloka,” ta popi ngaaka.
Sankwasa okwa nyenyeta wo kombinga yaaleli mboka haya landitha omavi, ya fa taya landitha okakuki.
Ta ti, shoka kashi li mondjila, ihe omavi naga landithwe momukalo gu li nawa pamilandu dha tulwa po.
Omupresidente Netumbo Nandi-Ndaitwah esiku ndyoka okwa holola euvonayi omolwomayipumomumwe momalelo gopamuthigululwakalo oshilongo ashihe.
“Sho tatu popi ngeyika momalelo gopamuthigululwakalo ngoka ga ndhindhilikwa ge li 53, ge li 16 kage na aaleli yopamuthigululwakalo omolwaomayipumomumwe. Shoka otashi ti ngiini, shapo omwa hala okutya ota mu vulu okukala niilongo yaa na aaleli,” ta nyenyeta ngaaka.
Ta pula kutya wo ta ti, “nenge omwa hala kutya kehe ezimo nali kale lyi na aaleli yalyo? Shoka itashi ningwa mo muka.”
Nandi-Ndaitwah okwa indile aaleli ya hulithe po omanyenyeto nokwaa na mbili momalelo gawo oshoka otaya ngushulula omuthigululwakalo.
“Oshilongo shaa na omuthigululwakalo, kashi shi oshilongo, onkene ogu na okusimanekwa. Omuthigululwakalo ogo omulilo gwoshilongo onkene kagu na okudhinwa,” ta kumagidha ngaaka.
Omalelo gopamuthigululwakalo agehe oga gongala okukundathana omaupyakadhi nokwiipa omayele ga pamba mbyoka tayi holoka momalelo gawo.