Taimi Haihambo
ONGWEDIVA – Onduba yovanafaalama moshitukulwa shaShana oya li ya ongala onghela pombelewa yaAMTA mOngwediva, ve ya okulandifa omahangu avo.
Molwomuloka muwa neudo, ye AMTA a kala he shi ningi shito, okwa tameka opoloyeka yokulanda oilya kovakwashiwana, unene tuu ava va li va lima omahangu ahapu.
Omukwatelikomesho wopoloyeka ei Steven Iimbili okwa ti opoloyeka ohai ningwa mOngwediva, Okongo, Tsandi nOmuthiya.
Okwa ti opologalama ei oya etwa po kepangelo okudilila kouministeli wounamapya, opo va dule okuongela oilya momaanda epangelo opashinanena, va ningila oshikukuta ile ondjala ye ya ombaadiilila moshilogo, ovanhu ove na ngaho ouxupilo woshali.
Iimbili okwa ti ohava lande ashike omahangu, osho yo omapungu shaashi oo ashike hava dulu okupungula momaanda avo.
Ovakufimbinga mopoloyeka ei ohave ke lishangifa koNamibia Agronomic Board, kutya ova hala okukufa ombinga, ye AMTA ta kufa ko omadina avo.
Tuhafeni Nandana omukalimo waShana okwa ti neudo okwa kufa ombinga shaashi neudo okwa li e na eteyo liwa.
Okwa ti okafilinga aka ha ka di mo oka pama lela, nota indile ovakwashiwana kutya, ponhele yokukala ve na oilya tai tukilwa momaanda, nava tameke okutopola pokati, imwe tava landifa yo imwe tava tula momadimo.
Vati ngeenge tashi ya kondado ei hai futwa ovanafaalama ava, kape na lela ondado ya tulwa po ofaafaa kutya oshako otai kala i na ingapi. Ondado vati ohai likolele ashike koshiviha kutya efimbo olo oili puIngapi.
Iimbili okwa ti ota indile ovanafaalama ava inava kufa ombinga, va kufe ombinga shaashi opoloyeka otai i fiyo omuNovemba 2025.