WAKASHAMANE – Ovapolifi tava longele keengaba komuvelo Wakashamane ova hokolola tava ti ngeenge tava ningi omapekapeko okukonakona omalinyengo ovanhu ohava ende keemhadi molwaashi kape na eetuwa dopolifi. 

Ova ti eshi oshi li eshongo linene shaashi paife ohava longo noudjuu okukandeka oimbuluma keengamba. 

Edi ove di popya pefimbo kwa li tava lombwele oilyo ya dja keumbo lopashiwana lopedu eshi ya talela po keengaba Omaandaxa. 

Oilyo yolaata yopashiwana oye lipyakidila okutalela po eengaba da yooloka moshilongo nelalakano lokudidilika omashongo a taalelwa keengaba. Oshivike sha dja ko oya talela po natango eengaba kOshikango naAngola. Warrant Selicia Thomas omukulunhu woshikondo shopolifi tai longele keengaba daWakashamane okwa popya ta ti kashipu okulongela keengaba pehe na otuwa shaashi ohava ende mokati komutenya tava dingonoka eengamba okukelela oimbuluma. “Paife osha ninga shipu kovanhu va dje noinima koAngola oyo inai pitikwa moshilongo shetu. Eetuwa tadi di moAngola ohadi faduka po ovapolifi ashike ihatu dulu oku di landula shaashi katu na eetuwa,” ta ti. 

Okwa yelifa ta ti ngeenge ova pewa otuwa otashi va kwafele va kale tava longo noupu okukonakona omalinyengo ovanhu keengaba. Omukulunhu wopolifi moshitukulwa shaMusati, Commissioner Ismael Basson okwa koleka ta ti osho shi li keengaba komuvelo Wakashamane kaku na sha eetuwa dopolifi. 

Okwa ti ova teelela oshimaliwa okudja kepangelo opo va dule okulanda eetuwa dopolifi. Ovanambelewa tava longele kouministeli woikwameni ve li keengaba ova hokolola tava ti ova taalela eshongo loixwa ya dingonoka eengamba osho shi li eshongo linene okukonakona omalinyengo ovanhu ngeenge tava tauluka eengaba. 

Ovati ovanhu vamwe ohava faduka po va uka moixwa ndele tava ka hondama nokuholeka oinima oyo va umbata. 

Ovanambelewa va dja kehangano loNamra tava longele keengaba ova hokolola tava ti ohava longo noimaliwa efimbo keshe ashike keengaba kaku na ovapolifi va wana noshi li sha nyika oshiponga shaashi otava dulu okuponokelwa kookalyamupumbo. 

Natango ova popya tava ti ova taalela eshongo lokuhe na oufano keengamba osho yo onetiweka yokuninga omakwatafano opaungoba. -fhamalwa@nepc.com.na