Auleria Wakudumo 

Ovakwanedimo 15 vomomukunda Onawa mOngwediva ova fiwa pomutenya eshi omundilo wa hanauna po eumbo lavo ndele tamu pile omaufemba avo oshilongo, eedjapo dovanyasha dokoiputudilo yakula, oukalata vokoshipangelo noidjalomwa yavo. 

Mwene weumbo Martin Amutenya, omukulupe weedula 64 okwa holola kutya ondalu oya etwa vati komonamati, oo a li ta tyaatyele oradio kolusheno loketango. 

She likolelela kolopota oyo Amutenya a yandja kopolifi, omona vati okwa fiya oradio tai tyaatyele okudja 09h00 fiyo opo 15h00 lwaapo. 

Amutenya okwa holola yo kutya oradio oya li ya mangelwa pombada yonduda yeehoni eshi vali tai tyaatyele. 

Lwopotundi 15h00 lwaapo, omanga mwene weumbo ta fuwa po, okwa uda vati omutopo wa topa pombada yonduda opo pwa li pe na oradio nosola omanga ye a li meni londuda. Opolifi oya holola kutya Amutenya mokutupuka mo monduda vati okwa hanga nale ondalu yaNelyanga ya haka. Okwa kendabala okuumba mo oinima imwe monduda. Mokukendabala okukufa mo imwe yomomamona aye, Amutenya okwa mona oshiponga vati kombuda, komaoko osho yo keenyala. Amutenya okwa holola kutya omundilo owa tandavela nokuhaka moule wokafimbo kanini ndele tau hanauna po onduda oyo filufilu naikwao oyo ya li polwaamba layo. Meumbo omu ohamu di ovakwanedimo ve fike po15. Aveshe inava mona oshiponga, kakele kumwene weumbo ou a pya kombuda, komaoko osho yo keenyala eshi kwa li ta kendabala okukufa mo oinima imwe monduda. Otaku hokololwa mwene weumbo a twalwa koshipangelo shepangelo kOshakati oko e li ta mono epango lopaunamiti. Oinima oyo ya hanaunwa po kondalu yanNelyanga ongaashi, omaufemba oshilongo: oumutwe voshilongo neendjapo domadalo dovakwanedimo 12, oukalata vokoshipangelo veli vane, oidjalomwa, omwa pila yo oimaliwa i fike poN$1 400, eendjapo dovanysha dokoiputudilo yopombada dovanhu ve li vatano, ombete yodaabulu naikwao imwe ya wedwa po. 

Oinima aishe ya hanaunwa po otai tengenekwa i na ongushu yoshimaliwa shi fike poN$10 000. -wakudumouleria@gmail.com