Auleria Wakudumo 

ONDANGWA – Immanuel Hainyanyula weedula 49 ou vati a dipaa omukainhu waye komesho yainamweno okwa anyenwa omhito yokulifutila mo modolongo pefimbo a holoka momhangu yamangestalata waNdangwa onghela. Oshibofa shaye osha undulilwa komafiku 16 Maarsa 2026 opo ku ningwe omakonakono omoule. 

Omupopiliko wopolifi moshitukulwa shaShikoto, Chief Inspector Ellen Nehale-Kangulu okwa holola kutya oshiningwanima eshi osha ningwa Omaandaxa efimbo lomutenya, sha ningilwa poundingosho vopomukunda Omanyanga. Nakufya okwa tongololwa oye Kristofina Hainyanyula, omukalimo womomukunda Omanyanga. 

Otaku hokololwa omufekelwa okwa hanga vati omukainhu waye ve li naina poundingosho. 

She likolelela keedombwedi odo da li po, vati omufekelwa ina popya nande oshitya shimwe nomukainhu waye. 

Okwa nhipula mo ombele ndele ta hovele okutwa omukainhu waye oikando ihapu monhulo nokombuda. Otaku hokololwa kutya omukainhu okwa xulifila poshiningwanima opo. 

Otaku hokololwa yo kutya ovalihomboli ava vavali ova kala nokulihepifafana nova li tava ka holoka komesho yomhangu yOshiwambo koomwene womukunda Omanyanga ngefiku la shikula ko. 

Opolifi oya kumaida oshiwana opo shi kale tashi lopota omahepeko omomaumbo pefimbo. 

-wakudumoauleria@gmail.com