ONAKAYALE – Omumwayina gomuhikingalo Omunamibia a tseyika nawa Ras Sheehama okwa ti paku mu tseya mumwayina haye a li ngeno ta pumbwa ehungomwenyo uuna a li e na uudhigu oshoka ye mwene omuhungimwenyo, omugandjimayele osho wo omupukululi. 

Sheehama okwa hulitha momasiku gatano gaSepetemba nuumvo sho a ikutha omwenyo, i imangeleke. Okwa li e na omimvo 59. 

Okwa tseyikila oongalo dhoreggae. Sheehama okwa li a yi kombanda momumvo 1979 no kwa galukile moshilongo momumvo 1990. Okwa thigi ko omukulukadhi gwe, oyana yaheyali naatekulu omugoyi oshowo aamwayina. 

Wilhemina ngoka a popile ko wo aamwayina okwa ti, Sheehama oha popi kutya kap ena omuntu kee na uudhigu, kehe gumwe ota vulu okuteka po. 

Aamwayinaoyadhimbulukwamumwayina ongomuntu gombili, gwaantu ayehe, e hole kehe gumwe ye ke hole omahokololo osho wo omalwaambo. “Sheehama oku na oshiho nakehe gumwe, ke na kutya olye, e na nenge kee na sha. Thimbo limwe oto adha e li naanona mboka haya zi momapandaanda kohi yoontopa, ta topola ohole ye nayo,” ta ti ngaaka. 

Ta ti, oya kala ye na ekwatathano ewanawa namumwayina okuza puushona sigo ya koko. Ta hokolola kutya ota dhimbulukwa sho a kala noku ya ganda kutya, ngele ya gongala inaya hokola aantu, ihe naya kundathane shoka tashi tungu. 

“Omumwameme okwa kala e na onkalo ya pumba, iha tongola aantu, ihe oha taamba ko kehe gumwe kaape na kutya oguukwatya wuni,” ta popi ngaaka. 

Ta ti, nonando a kuutumba mpoka, natango ina itaala kutya Sheehama okwa hulu ko, nota dhiladhila pamwe oku na mpokate li ta ka za ko esiku limwe. 

Wilhelmina okwa hokola kutya sho ya kala kosikola, Sheehama okwe ya longo okukala kuyo yene nokwiithikamena po. 

Ta ti okwa kala noku ya tsitsimika kosikola opo e ya lwithe, ihe ngele ya sindwa mboka ye ya dhenga ohaya dhengwa ishewe Sheehama. 

“Oshoka okwa li tuyashona inatu tseya kutya nani okwa li tatu longwa okukala kutse yene uuna tu li muudhigu,” ta ngaaka 

Ngoloneya gwoshitopolwa shaMusati ImmanuelShikongookwagandjaomahekeleko kaakwanezimo, ta ti ezepo lyomuhikingalo Sheehama nalyo olye ya gumu shinene. 

Gumwe gomookuume kaSheehama, Pombili Namundjembo okwa ti okwa kala hi ithanwa edhina lyaRas oshoka naye oku na orasta momutse. 

“Olundji onda kala nokudhana oongalo dhaRas Sheehama mohauto yandje oshoka ohadhi kala dhi na etumwalaka lya yela lyo olyi na ongushu,” ta ti ngaaka. 

Namundjembo okwa ti oongalo dhaRas Sheehama kadhi na esiku dhi pwe ongushu neta, nodhi holike koyendji moshilongo ashihe koonono. 

Oyendji komalungula oya gandja omahekeleko noku mu dhimbulukwa ongomuntu gombili nokuhole kehe gumwe. 

Ongulohi yEtitatu oshigwana koWindhoek osha li sha gongala momwaalu ogundji sho kwa li kwa ningwa ondjimbodhimbulutho, kehala tali ithanwa Zoo Park. 

Aahikingalo ya yooloka oya li yi imbi nokudhimbulukwa Sheehama. 

Olutu lwaSheehama otalu thiki ngula pokapale kaAndimba Toivo yaToivo mOndangwa. 

Okwa tegelelwa a ka fumbikwe momasiku 20 gaSepetemba koAnumulenge moshitopolwa shaMusati. 

Oshituthidhimbulutho otashi ningwa momasiku 19 gaSepetemba pegumbo koNakayale moshitopolwa shaMusati. 

-vkaapanda@nepc.com.na