Khoekhoegowab, Languages

Aore-axagu ge ǂhanub huiba ǂkhâba hâ 

2025-09-162025-09-16By Correspondent
Aore-axagu ge ǂhanub huiba ǂkhâba hâ 

Zebaldt Ngaruka

!URI!KHUBIS – !Huis ǀhonkhoeb, 4×4 Boys2Man !nans dib, Sidney Booisi ge ǂhanub ai ǂgansa ge dī, ǂhâbasa ǂkhâ!nâsa nî māse īsa aore axaga ǀhûhâsib !nâ !gâi ǂūsiga nî ūhâse aiǂhomis di dītsâdi !nâ.

Nē !nans hîa ge 2020ǁî kurib ai a ǂnuwihes di !uru ǂâibasens ge,aore axaga huikhâi tsî !âubasensa nē hâ ǁkhâǁkhâi tsî daoǁgaudi !nâ-ū māsa. ǀGūǁaes ge 4×4 Boys2Mansa !Uri!khubis hîa Omaheke ǀkharib !nâ ǂnôas tawa ge ǂgaeǁare hâ i.

New Erab ǀkhab ge ūhâ i dî!nâ­gam­ares !nâb ge Booisa ge mî, ǁaexa i go !khaisa, ǂhanub nî ǁîga !khō!om tsî ǁkhā !ēdi hîab tareǀgôadi !aroma ra māde axagu !aromas tsîna nî māsa. Booisi gere mîsa !oa gu ge axaga khaos ai ǁnāxūmâihe hâ tsîs ge nēsa ǂhanub khāba xu kaise a ǂau nē mâsiba ǂhanu kais !aroma.

“Daoǁgau tsî ǁkhāǁkhākhâis axaga î gu, !ereamxasiba ū tsî ǀhûhâsigu !nâ !gâi ǂūsiga aimâi hâ ûiga ûis ge a dana ǁgūba. ǀGôadi ai ǀgui ǂâisa ǂnûis ge ǀgui harebe-i tsîna ūhâ tama hâ, axagu hoaǁae ǁîdi kha ǀhûhâsigu !nâ ǀguipa hâ amaga. Hoa surikha ge ǀguitikō ǂâis tsî !khōǂhumisa ǂhâba hâ,” tib ge ǁîba ge mî.

“Sida proxrammi ge !hū!nāsi ǂōǂōsiba oresa hōbas ai hâ !hū!nāsi oe-amsa, aiǁgause ǂkhawadīb ǁaxasin hîa gu aorekhoega !nāsase a !â!nân khami. Sida ǁkhoreb ge aore khoeb domga ǂoaxa-ūsa, !nāsa omaridi tarekhoedi xa ra !khōdanahe ǁaeb !nâ,” tib ge Booisa ge mî. Nē proxrammi !nâ-ū gu ge ǁaupexa 160 axaga !hūb a ǂhabase ǁkhāǁkhākhâide ge !khō!oa. Mâ axab hoab ge ǁkhāti ǀō-aisa !gôasa ge !khō!oa, ǂanǂuihes tsî ai!gûsa !haras !aromadi !aroma.

ǁNā ǁaxasib tawab ge gowaǀîsa gere mā soab aib ge Omahekeb ǀKharisi Mûǂamaob, Pijoo Nganateba ǁ­îb di kaikhâis ǂgaroba ǀgoragu tsî gere mî, ǁîb tsîn ge nēpa ǂnôa ǀnî ǂkhamkhoegu di ǁharodi !nâ mâ i !khaisa.

Nē !gom mâsigu ka hâ, xaweb ge Nganateba axaga gere ǂgaoǂgao!nâ, ǁîgu ǁgoaǂuidi ǂamai mâǂoasa. 4×4 Boys2Mans ge !kharaga skolgu !nâs tsîna !nanrode ge ǂnuwi, aiǁgause ǀGapi Texnise Skoli (HTS) ǀAeǁgams !nâ mâb khami, axagu ra kofi-i tsî tsamperena ǁamaxu tsî gôade ǁkhâǀaesenni !aroma a ǂhâbasa pedga ǁamabase. HTS axagu ge !hû­ǁare hâse Nossobvilles axagu ǀkha ra sîsen.