Ministeris Sîsengu tsî !Nari!oabadi dis ge 1 500 auton hîa ǂhanub xa a ǀhonkhoe-aihena nî ǁamaxu. Nē auton ge ǁnān hîa 120 000km ga sī!nâ hân tsî ǁnān hîa koro kurigu xa a !nāsa kuriga sîsenūhe hân tsîna !khōǂgā hâ.

Sîsengu tsî !Nari!oabadi ministeri, Veikko Nekundib ge nē ǂanǂansa ǂoa ge wekheb di Wunstaxtsēs ai !Haosi ǂNûs !nâ ge dī. Ministeri ge ǁgui!ā ts ge mî, nē dā!haroda ūs, ǂhanub di dītsâdi auton nî ǂgaoǀkhāsa !norasasiba !khōgā tsî ǁkhāti sîsenūs !nâ tā kai mā­ǂuide ga a !aromas ai hâsa ra ǂkhâ!nâ. ǁKhātib ge nē mî­ǁguiba, ministeris proxrammi hîa auton gaxuse daogu ai ge hâ tsî !aruǀî marisi aib ai huib ase ī tama, xawe ǂoa!nâs ase ǀgui hâna xu ǀgoras diba xu ra !hui.

Ai!âb ministera gere mîs ge, ǂhanub auton ǂnamipe hâ xoaǁguigu !nâ i !gāsase ra mîhesa, auton ha ga 120 000km a !kharu tamas ka i o koro kuriga a sī!nân nî ǁamaxuhesa, xawen ge !nāsa auton hîa 2014ǁî kurib !nâ ge a ǁamahena noxopa sîsenūs !nâ hâ. Nē mâsigu !nâ ra sîsenūhe auton di kō!gâs ge ǀgapi ǂganǀgauba !khōǂgā hâ, ǁnāpas ǁîna sîsenūs !nâ !norasasiba dîsaob !naka ra mâse.

“ǂHanub a ǀhonkhoe-ai auton ge !hūb a ǂhabase hoa ministeridi, ǂnûiǂgādi tsî ǀkharigu !nâs tsîna !kharu ge disi kurigu !nâ, !aruǀîn ­awosasib kha noxopa a sîsenūhe ǁoa !khaisa ra ǁgau, tsîs ge nēsa ǁgariǁgarisa ǀasa kais proxramma ra ǂgaoǀkhā,” tib ge ministera gere ǁgui!ā. Nekundib ai!â gere mîs ge, xoaǁguib autona ssenūs dib !nâ i ǂhanub autona hîǀhurus tsîna ǁkhaes xa ra mîhe tsî mâtis nēsa marisi aib ai ǁgâiba a ǀoroǀoro ǁkhās tsîna. ǁNā 1 500 autona xu ǀgoras xōǀkhās ge ministerisa ǁkhāti 306 ǂhanub auton tsîna 16 Gamaǀaeb tsî 3 Taraǁkhumuǁkhâb 2025 dis kōse ǁgonǁamaxus !nâ-ū ge ǁamaxu. Nē ǁamaxudi hîa ge 40 ǁgonǁamaxudi !nâ-ū a !kharun ge N$24 miljunsa ge ǂgâxa-ū. – Nampa