Taimi Haihambo 

Omulumenhu weedula 19 okwa fya eshi vati a tuwa nombele mombuda pefimbo kwa li ta teke omeva. 

Oshiningwani osha ningilwa mexuliloshivike kolukanda Wanaheda moWindhoek. 

Nakufya okwa tongolwa oye Ernesto Lucas Ngongo Ndara. 

Opolifi oya hokolola tai ti kutya Ndara voo nakaume kaye ova li va ka teka omeva ndele tava hangika kovalumenhu vavali ovo ve li ovafekelwa. 

Umwe womuvo vati okwa pula Ndara ngeenge oku mu shi ye ta dimine kutya oku mu shi ndele tava i. 

Konima yokafimbo kaxupi, omufekelwa natango okwa alukila puNdara, ndele ta denge Ndara omanghava e li avali moshipala. 

Nakuninga oshihakanwa okwa dengwa omanghava avali ndele ta kufa emanya nokukupula omufekelwa, ashike ole mu shekuna. 

Omufekelwa vati okwa kufa ombele yokapi, ta taataa Ndara oule weemeta 40 ndele te mu tu mombuda. 

Konima Ndara okwa lotekela keumbo ngeno a ka konge ekwafo, ashike ohonde okwa li tai kunguluka okudja molutu. 

Okwa xulifila mondjila yokuya koshipangelo. 

Omufekelwa okwa tulilwa moipandeko kopolifi kOkahandja. 

-Taimihaihambo2000@gmail.com