Auleria Wakudumo
Ehangano lokukalela po ovanailonga hava longo meefitola hali ifanwa oNamibia Wholesale and Retail Workers Union (NWRWU) otali indile minista wouyuuki osho yo minista woshimaliwa opo ve lidope moshikumungu shomahepeko ovanailonga ovo hava longo meefitola nokukwashilipaleka kutya aveshe ova kalelwa po.
Hamushangandjai wo-NWRWU Victor Hamunyela okwa ti ehangano lavo ola didilika omahangano mahapu inaa halela ovanailonga va kale ve li oilyo yo-NWRWU nokukalelwa po ngeenge ve li momhumbwe nonande oshi li oufemba wakeshe umwe moshilongo.
“Ovanailonga vomeefitola ova pumbwa okutalwa ko ongovayakuli votete hangaashi va talwa ko inava fimana. Ovayandji voilonga veefitola inava pumbwa vali okukala tava hepeke ovanhu ngaashi tave shi ningi,” Hamunyela ta holola.
Meenghundafana naKundana, Hamunyela okwa ti nonande pe na omhango oyo tai pitike ovanailonga aveshe va kale va kalelwa po, eengeshefa dihapu ihadi tula omhofi meisho okukala va kwashilipaleka kutya ovanailonga vavo itava i mekwatafano nehangano loku va kalela po.
“Omahangano ngaashi oPupkewitz, Indongo Toyota, M&Z, Volkawagen, Ford, CIC, Awutow, Clicks, Eefitola doPep, TFG (ongudu yoFoschini noMr Price) ova kala mokulonga eedula nhee da ka dilongela itava pitike ovanailonga vavo va kale v ena ehangano lokuvakalela po,” Hamunyela a tofa mo omahangano amwe.
Hamunyela okwa fatulula kutya nonande omahangano amwe aa ohaa ti kutya ehangano lokukalela po ovanailonga otali dulu okupopya navo, ohava yandje efimbo itali pitike ekwatafano la kola. Ovanailonga vati ohava lombwelwa yo kutya inava waimina nande ehangano lasha eshi tava pewa oilonga.
“Onghalo meefitola dimwe oya divilika fiyo osheshi ovanailonga va mbadapalekwa okupopya novanambelewa okudja kehangano lokuvakalela po. Ovanailonga vamwe ohava longifwa va kale ovatonateli vavakwao nokutala ou ta popi novanambelewa op ova lopote kovanghona vavo,” Hamunyela ta ti ngaho.
Hamunyela okwa ti ova koneka kutya keshe efimbo tava popi nomunailonga wonhumba, eshi tava ka alukila mofitola omo, omunailonga okwa tewatewa nale. Okwa weda po kutya ohava yandje omatomenho anafangwa okutaataa ovanailonga shaashi ove shi shi kutya inashi pitikwa koveta okuta omunhu moilonga molwaashi va popya nehangano lovanailonga.
Hamunyela okwa ti ehangano lokulandifa oikutu oPep oya lombwela ehangano lovanailonga kutya otali dulu okukalela po ovanailonga vavo xwepo shi dulife ehangano lovanailonga.
Ehangano lovanilonga ola didilika yo kutya omahangano amwe ohaa mono omayakulo mahapu okudja kepangelo ashike natango otava twikile okuhepeka ovanailonga vavo.
Hamunyela okwa ti ehangano lovanailonga vomeefitola otali indile minista wouyuuki opo a ye mo onyala moshinima eshi nokukwshilipaleka kutya ovanailonga tava longele omahangano eefitola ova amenwa.
Otava indile yo ouministeli woimaliwa opo u kwashilipaleke kutya omahangano unene oo taa mono omakwafo okudja kepangelo okuna eudafano nehangano lovanailonga.
“Okukala u na ongeshefa itashi ti monifa ava tave ku longele oixuna,” Hamunyela ta ti ngaho.
Ehangano lovanailonga ola holola yo kutya oleli longekida okuyandja oumbangi kombinga yonghalo yovanailonga ngenge kouministeli.
-wakudumoauleria@gmail.com