ONDANGWA – Thomas Sheya (33) ngoka anuwa a dhipaga uunona we uyali mOsoondaha okwa tindilwa i ifutile mondholongo. 

Oshipotha osha undulilwa komasiku 23 Maalitsa omumvo tagu ya. 

Sheya anuwa okwa kutha uunona we koWindhoek e te ke wu dhipagela komukunda Onkani moshitopolwa shaShikoto. 

Omutamanekwa okwa holoka komeho gamangestrata Nelao Ya France, omanga Justina Shiweda a kalele po epangelo. 

Sheya okwa tindilwa eyifutilemo, omolwuunene woshipotha osho wo omakonakono gopolosi ngoka ge li metifa, nompangu oyi na uumbanda kutya ngele okwa mangululwa otashi vulika a ye omakonakono gopolosi moshipala, sho kasha li natango muuwanawa woshigwana a pewe ompito yokwiifutila mo. 

Omulumentu gumwe gwopomudhingoloko mpoka okwa ti ye okwa tuminwa etumwala kutya na ka tale ko omidhimba dhaanona komandoloma gomeya manga inaadhi lika po koombwa, ye ota ka imangeleka. 

“Onda li nde mu lombwele kutya ina ninga shoka ta dhiladhila, po opo nee mpoka a zi po i ifale kopolisi kOkatope,” ta popi ngaaka. 

Ta ti anuwa okwa kala ta hokolola kutya okuuvite nayi tu ulwa kusuwala ye omumwayina gwayina yaanona kutya haye he yaanona, ye te mu tuku iitya iinene. 

Omulumentu ngoka okwa ti okwa kala te mu kumagidha kutya ayihe na ekele kombunda, ihe nani ita pulakene. 

“Ongulohi yOsoondaha sho a zi poondingosho okwa zi po ta lili, u uka kegumbo hoka a ka longa iilonga yi li ngaaka,” ta hokolola ngaaka. 

Omumwayinagona gwomufekelwa Otto Uusiku okwa indile moshigwana ngele otashi vulu okuyambidhidha mpoka tashi vulu opo ku longekidhwe efumbiko lyaanona mboka yaali. 

“Ngaashi mu shi wete ngaaka omukulupe iha longo okwa ikolelela ashike mopenzela ye, otwa pumbwa omayambidhidho lela,” ta indile ngaaka. 

Uusiku okwa ti onkundana ndjoka oye ya uvitha nayi noonkondo. 

-vkaapanda@nepc.com.na