Lahja Nashuuta 

Erickson Festus, pastoli wongeleka yoshiveva mOshikango a shivika nawa nedina “Territorial Commander,” okwa ti ye ota ka kalela po ongudu yoBody of Christ momahoololo omalelelo eedolopa taa ka ningwa muNovemba neudo. 

Festus okwa ti ondjodi yaye okulela ongamayola wodoolopa yaHelao Nafidi, moshitukulwa shaHangwena, okwa kala nayo komutima. “Kape na epuko ile oudjuu ame ongomupiya womwene handi kufa ombinga momahoololo oludi eli” ta ti. 

Vati okwa itavela kutya eifano laye lopamhepo osho yo omashongo aa adja nokutaalela monghalamwenyo yaye vati okwe mu longekidila nale ouleli womepangelo. 

“Ombibeli oya ti kutya oilandopangelo noiwana oya lelwa nale kovafita. Yo opolotika oya etwa po kuKalunga. Onghee kandi wete eshi tashi nyenge nge shaashi aishe oya dja kuKalunga ou a pange eenghono edi,” Festus ta ti. 

Festus okwati okwa lesha ombibeli noku i manako oikando i li 58 moule womido 16, ndee vati ouwiliki wopapolotika nau kale u na omidi da dilila kuKalunga. 

“Eembelewa oda pumbwa okulelwa kovanhu ve na omhepo nouyelele waKalunga. Ovanhu ve na oshiwana komutima, ndele havanhu ashike ve na elalakano loku liyambapaleka. 

Okwa twikila kutya ye okwa kala omuleli wongeleka nowovanhu eedula da fika po15, no kape na eshi tashi mu imbi a kufe ombinga momahoololo. 

Ta ti ye Omunamibia kuyadi, noku na oufemba wokukufa ombinga mwaashi e udite a hala. 

Ashike nande ongaho eshi vati she mu fininika unene vati omaupyakadi aa ha mono a taalela ovanhu efiku nefiku. Okwa ti ovanhu vahapu otava mono oixuna shili kondjala, oluhepo osho yo ombili ya teka po momaumbo. 

Okwa yelifa yo kutya ye ita kufa ombinga momahoololo medina longudu yoBody of Christ, ndele yee ota kufa ombinga medina lovanhu ava tava mono oixuna. 

Festus oku li omufita akula moshilongo, ye vati oku na oitayi yeengeleka dili koshi yelelo laye d afika po 92 tadi lelwa kovafita ve li 420. -taimihaimbo2000@gmail.com