Auleria Wakudumo 

Elenga lakula lUukwambi nomunashipundi womalelo opamufyuululwakalo Aawambo Herman Ndilimani Iipumbu okwa indila oongoloneya va longele kumwe nomalelo opamufyuululwakalo opo va finde eengeleka dopamhepo dimwe odo tadi tukula oshiwana. 

Iipumbu okwa holola kutya okwa didilika omhepo youmwanaifana movashiinda nomovakwapata vamwe tai tukulwa keengeleka dopamhepo dimwe. 

Iipumbu edi okwe di holola pefimbo ta talelwa po kungoloneya woshitukulwa shaHangwena Kadiva Hamutumwa peumbo laye pomukunda Onamega. 

“Monale, ovashiinda ova li hava endafana vo tava udile vakwao ngeenge tava kuu. Monena hasho vali shi li ngaho shaashi vati ovanhu va lombwelwa kutya mushiinda shoye ile nyoko oye te ku li,” Iipumbu ta holola. 

Elenga lakula ola holola kutya oshinima eshi osha teya po omaushiinda mahapu mawa nokutopola omadimo mahapu. Okwa twikila ta ti oinima imwe kai fi yoshili. 

 “Jesus naye okwa velulile ovanhu noku va udifila ombiibeli ashike ino uda ta holola ovanhu komadina. Ngeenge ou na eenghono dokuvelula, oshike u na oku shi ninga nokutumbula omadina ovanhu? Ito dulu ashike okuvelula omunhu ngaashi Jesus a ninga,” Elenga tali pula ngaho.  

Ndilimani okwa holola yo omaudjuu amwe oo va taalela momidingonoko ngaashi ovanhu tava taulula eenhele needalate, omindilo tadi pi ponhele youlifilo osho yo elikufilo ledu. 

Okwa indila ngoloneya opo va longele kumwe mokulela nokupukulula oshiwana shavo. 

Ngoloneya woshitukulwa shaHangwena Kadiva Hamutumwa okwa udaneka kutya ota ka longela pamwe nomalelo opamufyuululwakalo opo a kwashilipaleke kutya ova kandula po omaudjuu amwe oo a tumbulwa metetekelo. 

Hamutumwa okwa holola yo kutya ota ka longela kumwe novaleli okuyandja ouyelele wa pumbiwa koshiwana. Okwa ti okwa didilika kutya oshiwana shokoushai unene ovanyasha ohava fyaala po komauwa epangelo shaashi kave na ouyelele wa wana po kutya oshike ve na okuninga. 

Ngoloneya okwa yandja oshihopaenenwa shoYouth Development Fund hano oshimaliwa osho sha yandjwa kepangelo okuyambidida ovanyasha. 

Okwa ti ovanyasha vokomikunda vahapu inava kufa ombinga shaashi kavena ouyelele mwaasho na kaveshi eshi tashi ningwa. 

“Ohandi indile ovaleli va kwatele komesho nokutwa ovanyasha momikunda omukumo opo va tameke eengeshefa davo. Ovaleli nava wilike yo ovanyasha kutya eengeshefa dilipi ve na okutota she likolelela keemhumbwe depangelo ngaashi ounamapya, omaudano, nadikwao dihapu,” Hamutumwa ta ti ngaho.