Taimi Haihambo

Okaku – Ongudu yavakalimo vaKaku, unene ovakulupe ova li va ongalekwa kopolifi yaShana oshivike sha dja ko, va yandje omakemo avo kopolifi vo va pewe omayele nomawedelepo.

Pefimbo loshihongi, ovukulupe ovo va li va holoka molwaalu uhapu, ova yandja ekemo lavo kutya, vo otava mono oixuna kokatoo, nova kanifa shihapu nai.

Natangwe Angolo  oo a li moshihongi okwa ti, okatoo oke va ningila unene kahapu. 

“Eshi nee tashi kumwifa osheshi kutya, shima ngoo omunhu wa nyekwa oimaliwa momukalo wokatoo nande lopota kopolifi ku na eshi ho mono po,” ta ti.

Angolo okwa twikila kutya vo ngeno eshi va shangifa eengodi davo ku-MTC, okuningila oimbuluma yoludi eli i kale ipu, ashike vati oshibofa shima sha i kopolifi ihava mono po sha vali. 

“Oimbuluma ngaashi okatoo paife oya ya ashike pombada. Omunhu shimha wa nane nande omayovi avali oho shikulwa keembudi. Ashike ngee owa nane nande N$20 000, onghee ngaho wa shikululwa keembudi,” ta ti.

Angolo okwa ti eshi osha fa ashike a ulike ekwatafano pokati kovanhu ava hava longo meembaanga, neengangala.

Omupopiliko wehangano lo-MTC Jonh Ekongo okwa ti ngeenge tashi ya pokatoo keengodi,  MTC oha dulu ashike okushikula ongodi yokatoo e i tete mo momhepo ngeenge a pewa olopota kopolifi.

“Oibofa yokatoo ohai fikile kopolifi. Ihai fikile kombelewa yetu. Nena ngeenge opolifi oya kala inai fika pombelewa yetu i lopote oiningwanima ei, shee tu dule okushikula eengodi edi, ohatu xulile ashike mounyengwi, ta ti. 

Nekongo okwa kunghilila oshiwana kutya MTC oku na ashike onomola yongodi imwe,o+264 818882000. 

“Ngeenge owa dengelwa kongodi tai ti oya dja ko-MTC, ndele kai shi +264 818882000, nena ngaho okatoo nale. Nohatu pula oshiwana shi kale sha kotoka,” Nekongo ta ti.–Taimihaihambo2000@gmail.com