Auleria Wakudumo 

Ovaneumbo momukunda Oshisa Shembungu moshikandjohoololo shaNesi ova tembuka meumbo molweendjaba odo da hanauna po eumbo lavo. Abed Imatwa, omunokomitiye yomomukunda Oshisa okwa holola kutya eumbo laava va tembuka oli li koxulo yomukunda, osho hashi eta va ninge alushe oshihakanwa ngeenge eendjaba da ponokela pomukunda. Ovaneumbo ava ova tembukila vati meumbo limwe li li meni lomukunda omo eendjaba ihadi hange noupu. 

Imatwa okwa ti ova lulilwa keendjaba de lihanena omukunda wavo aushe. 

Kansela woshikandjohoololo shaNesi, Festus Petrus okwa holola ta ti omalinyengo eendjaba moshikandjohoololo shaye kaeshi ape. Okwa ti nghene ovanhu va hovela okulonga oilongomwa yavo yomomapya, eendjaba oda kala hadi monika. 

“Eendjaba otadi dumwa momukunda Oshitumbe B, Okatenenge, Okatha kongala, Oshisa Shembungu nadikwao. Mopaife eendjaba da fika po20 oda monika tadi tavakana nokuhanauna omaliko ovanhu,” Petrus ta ti ngaho. 

Kansela okwa ti eendjaba oda hanauna omaumbo ahamano lwaapo. Petrus okwa holola kutya shaashi paife ovanhu ova kufa mo oikunonwa yavo momapya, paife otadi kendabala oku ka lya omatanga noilyavala oyo ya tuvikilwa momaumbo. 

“Momaumbo omo da ya, oda fudaula po eenduda dovanhu, tadi li mo omatanga, eenhanga noilyavala,” Kansela ta holola ngaho. Petrus okwa kunghilila ovakalimo vomoshikandjohoololo shaNesi opo vaha ende oufiku okudja keekamba. Ovakwashiwana otava indilwa yo opo vehe likufile oveta vo vene okuyasha ile okudenga eendjaba. Kansela ota indile opo va lopote nokushivifila ombelewa yaye kombinga yomalinyengo eendjaba. 

Kansela okwa ti ova shivifila ouministeli womidingonoko kombinga yonghalo yeendjaba moshikandjohoololo shaye novanambelewa ova udaneka kutya otave lilongekida oku va yakula. 

-wakudumoauleria@gmail.com