Auleria Wakudumo 

Ouministeli womidingonoko, eefuka nomapashiono owa holola kutya otau longo noudiinini okuamena ovanhu osho yo oifitukuti kepeya olo le lihanena moshikunino shoinamwenyo mEtosha. 

Momukanda wa pitifwa komupopiliko wouministeli Ndeshipanda Hamunyela, okwa ti ovanambelewa okudja kouministeli womidingonoko otava kwafelwa kovakwashiwana vopomudingonoko osho yo ovanambelewa vetanga leameno okudima epeya. 

Hamunyela okwa holola yo kutya ondalu yaNelyanga oya hovela kondje yoshikunino shoinamwenyo momukokomoko woshivike eshi. Omundilo owa kwatafana noshikunino shoinamwenyo notau tandavele keembinga neembinga. 

“Nonande ovanhu tava kendabala okudima omundilo, owa yaka unene notau endelele okutandavela keenhele doshikunino shoinamwenyo da yooloka,” Hamunyela ta ti. 

Hamunyela okwa ti omundilo otau fekelwa wa hovela mofaalama vokunduluka omakala i li popoepi noshikunino shoinamwenyo. Omundilo owa tandavela okudja mofaalama oyo fiyo omEtosha. 

Ouministeli owa kwashilipaleka kutya owa ninga eendjila, da tetwa komwiidi ou tau pi opo va kwashilipaleke kutya omundilo itau ka tandavela noshikunino ashishe. 

Ouministeli owa ninga yo onghendabala yokupombela omund ilo ome va nokadakadaka. 

Hamunyela okwa holola kutya natango kave na ouyelele wofaafaa kutya oshike sha pila momundilo molwaashi otau twikile okupya. 

“Eshi otashi dulu ashike okudidilikwa nokushivikwa ngeenge omundilo wa dimwa filufilu. Mopaife ohatu kendabala okuxupifa nokukwashilipaleka kutya ovanhu, oinamwenyo, eemboola domeva, neekamba dokupatolola mEtosha osho yo omwiidi woinamwenyo owa amenwa,” Hamunyela ta holola ngaho. 

-wakudumoauleria@gmail.com