RUNDU –  Sikwata sa banana kuzwelela kwa munzi wa Gcwagi mwa sikiliti sa Kavango ya Wiko, nebasiyezi mwa sabo kasamulaho akufumana situpu hane bali mwa nzila kuya kwa sikolo Labulalu, mapokola neba bulezi. Mapokola nebakile balizezwa kasamulaho apatululo yeo. Munzi wa Gcwagi ufumaneha mwa silalanda sa Musese kwa mukulela wa mukwakwa wa Rundu-Nkurenkuru.

“Kukulubelwa kuli nyandi nafumanwi apatami asanyanganyi kwa mukulela wa mukwakwa ki baituti. Lipiho zeñwi kuzwelela kwa sicaba lisinula kuli nyandi napila anosi mwa ndu yahae mi nabonwi ananwa bucwala bwa sizo busihu bwa kwa mulaho mwa munzi wa Gcwagi,” nekubulezi sibuabui wa sipokola mwa sikiliti sa Kavango ya Wiko Raimbert Muronga.

Muronga nabulezi hape kuli nebafumani sipupe sa 2lita sa bucwala mabapa ni situpu. Lipatisiso zapili neli fumani kuli nyandi nana ni mali mwa lingo ni mwahanu; kono situpu simano yo pazulwa kona kukazibwa hande sene sitisize lifu la hae. Nyandi nazibahalizwe kuba Andreas Mazambo Namwira, muuna walilimo zemashumi aketalizoho kaze ketalizoho. Bahabo neba lemusizwe, mi situpu sa hae nesi isizwe kwa siteshini sa mapokola sa Nkurenkuru kuyo libelela kupazulwa.