CHOI – Kasamulaho alilimo zeñata za kubilaela hala tokwahalo ya mezi mwa libaka za matakanyani, Ngambela wanaha Elijah Ngurare, nazibahalize Lasunda viki yefelile kanako yakutabela mukiti wa Tulikonge, kuli milelo yakuyandulula lisebelezo za mezi kuzwa Kongola kuya Katima Mulilo, ni kuzwa Katima Mulilo kuliba Ngoma, kungelela cwalo ni kuliba Sangwali, hamoho cwalo nikufita nzila ya Muyako kuliba Ngoma ise ifita fakubuzwa.

“Neni bulelezwi kuli lika seli zamaela fakunyatisisisa. Ye seli purojekiti yese ngile nako yetelele, mi ikatisa tiululo mwa sikiliti kaufela sa Zambezi. Kuzwelela kwa nuka ya Zambezi kuliba nuka ya Kwando,” nekubulezi Ngurare. Nabulezi hape kuli mubuso uitamile kubona kuli babanca baitenga mwa litaba za njimo kuzwisezapata sifumu ni kulwanisa bubotana. “Kamukwa ocwalo lubeleke hamoho kubona kuli munzi ni munzi una ni simu ya miloho. Nifiwa susumo kuli mwa sikiliti sa Zambezi buñata bwa sicaba bana ni masimu amiloho,” nekubulezi Ngambela.

Ngambela wanaha hape nakupile likhuta za sizo kuswalisana ni mubuso mwakutahisa musha wakubelekela lico kapa masheleñi, ili kalulo yabulela kuli ikatisa tiululo yetuna mwahala sicaba. Mwa manzwi ahae Nfumu Joseph Tembwe Mayuni III wa Khuta ya Mashi naize kwanda tokwahalo ya mezi ni mulilo wa magesi, tuto isiala kuba ya butokwa mwa libaka zewela mwa kamaiso ya hae. Hala zeñwi nabilaezi hape kuli mubuso ulyeha kutatulula taba ya miseto ya likhuta za sizo. “Ki taba ya butokwa kuli taba ya miseto ya likhuta za sizo ya tatululwa ili kuli mifilifili ikone kufeliswa. Kuswanelwa kukeniswa hande mwahala miseto ya mishobo ni miseto ya likhuta za sizo. Selubata ki miseto ya likhuta za sizo, kusiya batu bapila kobabata kupila mwa Namibia banze bakuteka sizo sa batu,” nekubulezi Mayuni.