KATIMA MULILO – sipalo sa sikiliti sa Zambezi nesi hatisizwe simubuso ki mubusisi wa sikiliti sa Zambezi Dorothy Kabula Labubeli. Sina sipalo sa naha sa silimo sa 2023 hane sipatalalize, sikiliti sa Zambezi sina ni batu babalikana 142 373, basali ba 72 376 kuyemela 50.8 % ni baana ba 69 997 kuyemela 49.2 %. 

Silalanda sa Katima ya tolopo kona sesina ni batu babañata babalikana 46 401, mi silalanda sa Judea Lyaboloma kona sesina ni batu baba nyinyani babalikana 8 738. Mwa manzwi ahae Kabula naize sipalo sa sikiliti ki sa butokwa kakuli sifa “bupaki bolutokwa mwa kulela hande, ni kuaba hande lika kaswanelo, nikukona kutalimela kuhula kwasikiliti kaswanelo.”

Mubusisi nakupile hape bayahi basikiliti kuli bange sipalo ni lipiho za mayemo asikiliti kuba zabutokwa. “Sipalo se ibe sona sesi etelela milelo ya mina, kumilemusa hala liketo za mina ni kufetuha mapa yakutalimela kuli koluzwa ki kai hala kumbweshafaza bupilo bwa sicaba sa luna, inze lutaalimela bukamuso sakata,” nekubulezi mubusisi.

Kabula hape naitumezi kwa katengo ka kakabona za sipalo sa naha, kona kaka zibahala ka Namibia Statistics Agency kamusebezi sakata one kapetile. “Sikiliti sa Zambezi si itama kusebelisa lipiho zeo mwa milelo, milelo yeo mwa kutahisa zwelopili mwahala sicaba. Luitama kuzwelapili kuba ni kabelo mwa milelo ya kwapili ya sipalo, kazibo yakuli lipiho za niti ni zetaha kabunako likonkiseza liketo za luna ni kukasha milelo ya kueza hande,’’ nekubulezi mubusisi.