Uuministeli womindhingoloko iixwa nomapashiyono owa pititha omushangwa kutya oohekta dhili kondje yEtosha 177 631 noohekta dhili 171 098 meni odha pi komulilo omanga oohekta dhili 14 783 muninginino mbangalantu wEtosha nadho dha pi po.
Omulilo ngoka gwa tamekele momasiku 22 gaSepetemba tagu fiki, kagu shiwike anuwa mpoka gwa zi nonando tagu popiwa gwa zi kombinga yokuuninginino.
Aanafalama mboka yena oohambo dhawo kombinga hoka otaya nyenyeta iimuna yawo ya halakana komulilo ngoka tagu fike, onkene sigo ompaka kayena uuyelele ngele imuna yawo oya pya po nenge oyili ashike mombuga.
Minista gwomindhilongo iihwa nomapashiyono Indileni Daniel okwa ti, sho a ningi omapekaapeko momasiku 27 gaSeptemba natango omulilo okwali tagu pi.
“Otwa longekindha aanambelewa okuza kuuministeli wa yooloka oshowo etanga lyegameno opo ya yambindhindhe okudhima omulilo,” ta ti ngaaka.
Daniel okwa popi kutya ethimbo ndika omulilo ohagu taandele mbala kombepo omolwa omwiindhi ngoka gwa kukuta. Okwa kumagidha wo aatalelipo yeli popepi nomahala ngoka ga fikwa opo yaaye popi nomulilo oshoka oshanika oshiponga, ta gwedha po kutya omulilo ohagu vulu okulundulula hoka guuka mbala.
Omugandji gomauyelele muuministeli womindhingolo nomapashiyono Ndeshipanda Hamunyela okwa ti omuloka go nuumvo, ogweya nomauwanawa ogendji, moka mwa kwatelwa omwiindhi kehe pamwe.
“Omolwa ombepo ndyoka ya tameka ku yele nuumvo, omililo nadhi kwatwe nawa, okuyanda embugaleko,” ta ku magidha ngaaka.
Hamunyela okwa kumagidha oshigwana shi kwate omulilo nuukeka okuyanda epeya oshowo ekanitho lyiimuna oshowo oomwenyo dhaantu.
Ta ti, oshigwana nashi kale sha ndhindhilika kutya omulilo ohagu taandelekwa kombepo, onkene nashi kale tashi kondolola omililo uuna tashi tema okukwashilipaleka kutya omulilo ogwa dhima thiluthilu.
Ta ti, okukeelela okuvule okupanga, onkene ngele shika osha keelelwa itashi holoka.
“Omulilo ogu na okukondololwa opo kaagu holoke, shika nashi tameke na kehe gumwe. Oshigwana nashi kunkule omwiidhi pooha dhomagumbo oshowo kehe pehala omulilo tagu vulu oku andjakana gu e te epeya,” ta popi ngaaka.
Kansela gwoshikandjohogololo Uuvudhiya Timoteus Shivute okwa ti, ndika olyo ethimbo epeya ha li mbugaleke omakuti oshowo okuhanagula noku faalela oomwenyo dhaantu, onkene oshigwana otashi kumagidhwa shi kale sha kotoka ethimbo kehe. Ta ti, omimvo dha zi ko omililo odha mbugaleke noonkondo.
“Nonando omililo ndhoka dha holoka inadhi shiwika natango mpoka dha zi, oshigwana otashi kunkulilwa shi kale aluhe tashi kwata nawa iinima hayi etitha omulilo, okuyanda uupyakandhi wolundhi ndoka” ta kumagidha ngaaka.
Shivute okwa ti, omvula yazi ko, omulumentu gumwe okwali a kanitha ohauto ye shoya pipo thiluthilu, pethimbo a li kombuga.
“Otaku tengenekwa kutya omulilo ogwa e twa komwiindhi gwa kakatela kohi yohauto, sho ohauto ya mono omweenye,” ta ti ngaaka.
– vkaapanda@nepc.com.na