Taimi Haihambo 

OSHAKATI – Omukuluntu melelo lyondoolopa lyOshakati Timoteus Namwandi okwa ti Olukanda Oneshila otali ka tulwa pamuthika gondoolopa. Ta ti, elalakano okuhulitha po oombashu, onkene mboka yeli ngaashingeyi molukanda Oneshila ihe oyena ehalo otaya ka pewa omahala kEhenye Extention1 taya ka tungilwa omagumbo okupitila mooproyeka dhokutungila aantu omagumbo. 

“Ooproyeka dhoka opo dhili nale dhailongekindha, dha tegelela ashike omaindilo uuna elelo lyondoolopa lya mana okulongekidha ehala ndyoka Extension 1,” ta ti ngaaka. Ta fatulula kutya okutungitha omagumbo, itaki thiminikilwa omuntu, naamboka itaya vulu otaya kala ashike mpoka yeli, ashike omahala otaga tulwa melandulathano. Namwandi okwa ti Oneshila otayi ukililithwa ashike yi kale melandulathano ngaashi omalukanda omakwawo . “Kape na ngoka taka tembundhwa, ihe otatu ka tula omagumbo momalandulathano noku etelwa omayakulo agehe popepi,” ta ti ngaaka. Ta ti ondoolopa yaShakati momimvo ndho komeho, otayi ka ninga oshilando, oshoka shoka ya thanekela Oshakati, uuwanawa owindji. 

Omukalimo gwomolukanda Oneshila Cornelia Thobias okwa ti kaye na nando uupyakandhi wokwaatembudhwa, shampa owala elelo yondoolopa tali ya etele omayakulo popepi. “Otuli momahala gathinana, ngele otwa pewa uuwanawa ngaashi omalukanda ngoka ga tulwa pa mu thika gwopandoolopa otatu kala tuuvite nawa oshoka ota tu kala twa mangulaka nawa tu na omahala getu,” ta ti ngaaka. Thobias okwa pandula wo elelo lyondoolopa omolwa ehumokomeho ndyoka lya ipyakindhila nalyo.