OSHAKATI – Omulongwa gokoshiputundhilo shopombanda International University of Namibia (IUM) mehuuliloshiwike okwa ponokelwa koombundhi eta yugwa iinima ye.

Omupevikuluntu gwopolisi moshitopolwa shaShana Frederick Ndjadila okwa ti oshiningwanima shoka osha ningwa ethimbo lyuusiku omanga ta zi kosikola. 

Otaku hokololwa kutya aalumentu mboka yali yahamano gumwe gomuyo okwali umbu emanya okuza konima tali mu dhenge mombunda nokugwa po.

Anuwa oyali ye mu ponokele ayehe noku mu yuga ondjembo ye ndyoka yali pamwe nomukanda gwayo, ongodhi yo peke oshowo oshimaliwa N$1000.

Okuza oshiwike ashihe sha zi ko osikola IUM oya kala ya kalelwa kaafuthi ya tega aanasikola oshowo mboka taya zi momauliko giipindi ngoka ga hulu Osoondaha posikola mpoka. Oyendji oya kanitha oongodhi dhawo oshowo iimaliwa, taya yugwa sho taya shuna komagumbo.

Opolisi yaShana oya kala noku kumagidha oshigwana shi kale aluhe uupathi ngele taya ende uusiku, oshoka aafuthi oya pimbila mOshana. Omukuluntu gwopolisi moshitopolwa shaShana Nafatal Lungameni Sakaria okwa ti, ohashi kala aluhe oshihwepo ngele oshigwana tashi kala tashi ende momahwata nenge tashi thindikilwa shi vulithe okweenda omuntu oye ayike.

“Ota tu indile oshigwana shi kale aluhe tashi longo kumwe nopolisi uuna ya mono taku longwa iilonga inaayi uuka shi kale aluhe tashi lopota opo opolisi yi thike mbala,” ta indile ngaaka.

Ta gwedha po kutya elalakano okugamena oshigwana opo shi kale sha manguluka kehe mpoka shili. vkaapanda@nepc.com.na