Nonando kwa lopotwa omulilo ngoka gwa ningi esiku tagu fike kEtosha oshowo omikunda dhimwe kOmusati tagu ende tagu dhimi, aaniimuna otaya nyenyeta kutya oya kanitha iimuna yawo oshowo oohambo nuulithilo wawo.

Omuniimuna gumwe Noah Pengeingeendunge Elago okwa ti okwa ti oohambo dhe dhili ndatu oshowo iimuna ye oya pyapo komulilo.

“Onduuvite nayi noonkondo itandi vulu okuya muule wa sho paife, oonzi dhandje dhili 17 odha pya po, oohambo dhandje ndatu odha pyapo thiluthilu. Uuyelele wumwe otandi wu kupe nale,” ta popi neyeme.

Iingo Shikale gwomomudhingoloko Otamanzi okwa ti okwa fikilwa iimuna ye ihetau, ihe yili 10 kayi wetike, keshishi ngele oya pya po nenge oya halakana ashike.

“Omulilo ngoka inagu faalela ashike iimuna, ihe ogwa eta embugaleko. Imuna mbyoka ya hupu po otayi ka sa ondjala oshoka omwiindhi ogwa pipo,” ta ti ngaaka.

Heimo Japhet okwa ti okwa kanithila mo oongombe dhe, ta ti ita vulu okugandja omwaalu paife oshoka iimuna ayihe inayi igwana po.

“Katu na natango uuyelele ngele iimuna yetu yapi po otayi futwa nenge ongiini. Sho twa kala niimuna yetu hayi lika po komambungu, Natiili okwa li ashike etu futu N$600, iimaliwa iishona nayi,” ta ti ngaaka.

Sakaria Shivute ngoka a mono po ashike iikombo itatu, miikombo ye yali 24 okwa ti, oshihwepo ngele tayaka futwa oshoka oya kanitha oshindji, epangelo nali tale po nawa pongushu yiimuna uuna tali futu opo yaka vule oku ka landulula.

“Iimaliwa mbyoka hayi futwa ihayi kala ya gwana oku ka landulula oshimuna, shoka hashi tu kanitha no hashi kala oshidhigu okueta po iimuna natango,” ta nyenyeta ngaaka.

Uuministeli womindhingoloko owa ti, omulilo ogwa dhimwa thiluthilu mEtosha, ihe oyeli metifa okugongela uyelele kutya iiyamakuti niimuna ingapi ya pi po komulilo.

“Uuyelele mboka ota tu wupititha mbala ngele twa mana,” ya shanga ngaaka.

Omulilo ngoka gwa tamekele momasiku 22 gaSepetemba tagu fiki, anuwa ogwa zi pehala ndyoka hali ndulike omakala, gwaandjanekwa kombepo.

vkaapanda@nepc.com.na